DIE OPENBARING 6:5-6
DIE OPENBARING 6:5-6 Afrikaans 1933/1953 (AFR53)
En toe Hy die derde seël oopgemaak het, hoor ek die derde lewende wese sê: Kom kyk! En ek het gesien, en kyk, daar was 'n swart perd; en hy wat daarop sit, het 'n skaal in sy hand. En ek het 'n stem tussen die vier lewende wesens hoor sê: 'n Rantsoen koring vir 'n penning en drie rantsoene gars vir 'n penning; en moenie die olie en die wyn beskadig nie.
DIE OPENBARING 6:5-6 Nuwe Lewende Vertaling (NLV)
En toe die Lam die derde seël oopbreek, het ek gehoor dat die derde lewende wese sê: “Kom!” En ek het gekyk, en werklikwaar, daar staan ’n swart perd voor my! Sy ruiter het ’n weegskaal in sy hand vasgehou. Ek het toe ’n geluid soos ’n stem tussen die vier lewende wesens hoor sê: “’n Skep koring vir ’n dag se loon en drie skeppe gars vir ’n dag se loon. Moet tog nie die olyfolie en die wyn skade aandoen nie.”
DIE OPENBARING 6:5-6 Bybel vir almal (ABA)
Toe die Lam die derde seël breek, het ek gehoor die derde dier skree: “Jy moet kom!” Ek het gekyk en toe sien ek daar kom 'n swart perd! Iemand het op die perd gesit. Hy het 'n weegskaal in sy hand gehad. Ek het gehoor Iemand praat. Hy was tussen die vier diere. Hy het gesê: “Iemand sal vir een goiniks koring of vir drie goiniks gars een silwer geldstuk moet betaal. En julle moet versigtig wees, moenie die olyf-olie en die wyn mors nie.”
DIE OPENBARING 6:5-6 Afrikaans 1983 (AFR83)
Toe Hy die derde seël oopmaak, het ek die derde lewende wese hoor sê: “Gaan uit!” Ek het gesien: daar was 'n swart perd. Sy ruiter het 'n skaal in sy hand gehad. Toe het ek iets soos 'n stem by die vier lewende wesens hoor sê: “Net een skeppie koring vir 'n dagloon en net drie skeppies gars vir 'n dagloon. Maar moenie die olyfolie en die wyn bederf nie.”
DIE OPENBARING 6:5-6 Die Bybel 2020-vertaling (AFR20)
Toe Hy die derde seël oopbreek, het ek die derde lewende wese hoor sê: “Kom!” Ek het gesien, en kyk, daar was 'n swart perd. Sy ruiter hou 'n weegskaal in sy hand. Ek het toe iets soos 'n stem tussen die vier lewende wesens hoor sê: “'n Rantsoen koring kos 'n denarius, en drie rantsoene gars kos 'n denarius, en moenie dat daar skade kom met die olyfolie en die wyn nie.”
DIE OPENBARING 6:5-6 Contemporary Afrikaans Bible 2023 (CAB23)
En toe hy die derde seël oopgemaak het, hoor ek die derde dier sê: Kom kyk. En ek het gesien, en daar was 'n swart perd; en hy wat op hom sit, het 'n weegskaal in sy hand gehad. En ek het 'n stem in die middel van die vier diere hoor sê: 'n Maat koring vir 'n penning en drie mate gars vir 'n penning; en kyk dat jy die olie en die wyn nie beskadig nie.
DIE OPENBARING 6:5-6 Die Boodskap (DB)
Toe die Lam die derde seël breek, hoor ek die derde lewende wese sê: “Kom!” Ek het weer rondgekyk. Soos verwag kon word, het daar weer ’n perd aangekom. Dié perd was swart. Die ruiter het ’n skaal vasgehou waarmee kos geweeg is. Ek hoor toe iemand uit die rigting van die vier lewende wesens sê: “’n Ou handjie vol meel vir ’n hele dag se werk of drie hande vol perdekos. Die duur kos soos olie en wyn sal julle nie kan bekostig nie; net die rykes sal!”