Advent: Die Reis Tot By KersfeesVoorbeeld

Die Krag Van Geloof

Iets kragtigs gebeur wanneer ons God genoeg vertrou om nie net te hoor wat Hy sê nie, maar dit ook te glo. As jy glo wat God sê die waarheid is en dat sy plan jou na die beste moontlike uitkoms sal lei, bring daardie vertroue vrede en seën. Nadat Maria die engel ontmoet en haarself aan God se plan vir haar lewe onderwerp het, het sy haar moeder se suster, Elisabet, gaan besoek. Elisabet was ook wonderbaarlik swanger nadat sy jare lank onvrugbaar was. Toe Elisabet Maria se wonderbaarlike nuus hoor, is sy met die Heilige Gees vervul en het verklaar: "Gelukkig is sy wat glo dat in vervulling sal gaan wat die Here vir haar gesê het!"

Maria het God geglo toe Hy gesê het dat sy geboorte sou gee aan die langverwagte Messias, en Hy het haar met vrede geseën toe sy met kommer gevul kon wees. Sy het vertrou dat die geboorte van die Verlosser van die wêreld — haar Verlosser — die moeite werd sou wees vir enige moeilike tye wat sy sou ervaar. Maria het God se plan vertrou en in die geloof vorentoe beweeg, wetend dat sy beloftes in haar lewe vervul sou word.

Terwyl Kersfees naderkom, dink na oor die wonderbaarlike gevolg van Maria se geloof: Die Seun van God is gebore! Wat het God oor jou lewe gespreek wat jy vandag moet glo? Vertrou sy plan, ontvang sy vrede en weet dat Hy die beste weet, en sien dan uit na die seën wat gaan kom!

Gebed: Vader, terwyl ek fokus op die seën van Jesus se geboorte, help my om meer soos Maria te word. Help my om te groei in my geloof en vertroue op u beloftes. Ek weet dat u plan vir my lewe na die beste moontlike uitkoms sal lei. Help my om enige areas van ongeloof in my lewe te identifiseer en gee my geloof dat U op maniere werk wat ek nie kan sien nie. Ek kies vandag om U te vertrou!