Jesus: Ons OorwinningsbanierVoorbeeld

Oorwinning Oor Die Dood 

Deur vir ons sondes te sterf, het Jesus vir ons vergifnis gekoop en het Hy ons gered van 'n ewige skeiding van God af. Hy het die hopeloosheid van die dood vervang met 'n lewende hoop in 'n ewige toekoms in die teenwoordigheid van die Here. Met sy opstanding ​​uit die graf, het Jesus Sy finale oorwinning oor die dood ten toon gestel en bewys dat die dood se mag niks in vergelyking met sy mag is nie. In Openbaring 1:18 verklaar Hy: "Dit is Ek, die Eerste en die Laaste, die Lewende. Ek was dood en, kyk, Ek lewe tot in alle ewigheid; en Ek het die sleutels van die dood en die doderyk.”

In hierdie lewe, is die dood vir ons 'n moeilike werklikheid, omdat ons die pyn van verlies ervaar wanneer mense na aan ons sterwe en ons uiteindelik met ons eie aardse sterflikheid worstel. Ons is nou egter geanker deur die waarheid dat Jesus die sleutels van die dood hou, en dat Hy 'n manier vir ons geskep het om deur 'n ander deur na die ewige lewe te stap. Die aardse dood is nie die einde van die verhaal nie. Daar is soveel meer wat vir ons wag! Jesus het in Johannes 11: 25 belowe: "Elkeen wat lewe en in My glo, sal in alle ewigheid nooit sterwe nie."

Omdat Jesus ons van permanente dood gered het, hoef ons nie ons lewens in vrees te lei nie. Ons is vry om vrymoedige, oorvloedige lewens te lei, en weet dat dit nie saak maak wat hier op aarde gebeur nie, ons sal vir ewig in God se teenwoordigheid en in die gemeenskap van sy familie leef. Selfs wanneer ons oor geliefdes treur, treur ons met hoop, wetende dat as hulle hul geloof in Jesus gestel het, ons herenig sal word en God se heerlikheid saam sal ervaar.

Laat die betekenis van Jesus se oorwinning oor die dood op hierdie Paassondag in jou hart insink en jou lewensfokus verander van die broosheid van hierdie lewe na ons ewige veiligheid in die hemel. Die dood het waarlik geen angel nie! Vier sy oorwinning, wees vol dankbaarheid en groei in jou oortuiging dat almal op aarde dieselfde hoop op die hemel sal hê wat jy het. Dit was in sy hart toe Hy vir die sondes van die hele mensdom gesterf het: dat nie een van ons die ewigheid sonder Hom sal deurbring nie. Daar is geen beter manier om jou dankbaarheid uit te spreek vir wat Hy vir jou gedoen het nie, as om die wêreld te vertel van sy liefde vir hulle. Dit is hoe ons die beste uit hierdie lewe put. Gaan dus die wêreld in en leef ten volle—want Hy leef!

Laai vandag se beeld hier af.