Perfek soos jy nou is

Kyk jy soms na die mense rondom jou en lyk dit dan vir jou of hulle almal so doelgerig deur die lewe gaan? Voel jy dan onseker oor waar jy op hierdie oomblik in jou lewe is en waarheen jy op pad is?

Die volgende woorde van W. Timothy Gallwey beteken so baie wanneer ek onseker voel: “Wanneer ons ’n roossaadjie plant, kritiseer ons dit nie omdat dit geen wortels en geen stam het nie. Ons behandel dit soos ’n saadjie, gee dit die water en voedingstowwe wat ’n saadjie nodig het. Wanneer die saadjie uit die aarde begin kom, veroordeel ons die plantjie nie omdat dit klein en onderontwikkel is nie; ook kritiseer ons nie die botsels wanneer dit wel verskyn, maar nog nie oopgaan nie. Ons staan in verwondering voor die hele proses wat plaasvind. Ons gee aan die plantjie die sorg wat dit in elke fase van sy ontwikkeling nodig het. Die roos is ’n roos vanaf die oomblik dat die saadjie geplant word totdat die plant eendag doodgaan. Dit het die hele tyd die volle potensiaal van ’n roosboom. Dit verander wel voortdurend, en tog, in elke fase, op elke oomblik, is dit perfek presies soos dit is.”

ONTHOU: Jy is perfek soos jy nou is.