Moenie na die wêreld luister nie

Voordat jy verder lees, gaan kyk na jouself in die spieël. Sê: “Hallo, pragtige mens!”

Ja, ek weet. Dit is seker een van die heel moeilikste dinge om te doen. Die meeste van ons sukkel om dit te doen, want die wêreld is daarop ingestel om vir ons te sê dit is nie waar nie. Die wêreld sê vir ons ons is nie goed genoeg nie. Ons verdien dit nie om liefgehê te word nie. Ons is nie mooi genoeg nie. Ons het nie waarde nie.

Ons moet leer om te sê: “Nee. Hou op. Dis nou genoeg. Dit is nie waar nie.” 

Kyk weer na jouself in die spieël. Wat sien jy waarvan jy hou? Dit kan enigiets wees: die glinstering in jou oë, jou glimlag, ’n spesifieke vaardigheid wat jy het, jou empatie met ander mense …

Wanneer jy ook al besef jou selfvertroue is effens min, fokus ’n paar oomblikke op alles in jou en aan jou waarvan jy hou. 

Wanneer jy jouself deur God se oë sien, is dit makliker om vir die pragtige, talentvolle en liefdevolle mens in die spieël te sien.

ONTHOU: Hou op om jouself te etiketteer – bemagtig jouself eerder.