Dink … gebed

Ons besige wêreld en die illusie dat ons sonder gebed kan klaarkom, is van die belangrikste redes waarom ons sukkel om gereeld en aktief te bid. Tog is daar ook ’n paar ander redes waarom ons ’n flou gebedslewe het:

• Ons weet nie altyd hóé om te bid nie.
• Ons is bang om te bid.
• Ons is nie desperaat genoeg nie.

As jy dalk voel dat jy nie altyd weet hoe om te bid nie, kan jy maar gerus wees: Jy hóéf nie te weet nie! Jy kan bloot jou gedagtes in verootmoediging tot God rig … die Gees self sal dan vír jou bid.

Indien vrees vir God jou dalk van Hom af weghou, kan jy maar wéét: Ons Vader het nog nóóit die hart van ’n opregte mens wat tot Hom nader, weggewys nie. Inteendeel: Ons liefdevolle Here omhels berouvolle en opregte harte met groot erbarming.

Indien jy voel dat jou lewe min of meer uitgesorteer is en dat jy nie eintlik gebed nodig het nie, moet jy weet dat jy baie mis! Jy loop dan die vreugde van naby-aan-God-wees en die oorvloedige seën wat Hy vir jou deur jou gebede wil gee, totaal en al mis.

Dink gebed. Leef gebed. Wees ’n biddende mens. Dan sal jy floreer!

Vader, vergewe my my arm gebedslewe en help my om élke dag naby aan U te wees en te bly! Amen.