Deel Jesus met VertroueVoorbeeld

Soek en Red

Jesus het ’n hart vir die verlorenes, so om soos Hy te lewe, moet ons dieselfde hart hê. In Lukas 19:10 verklaar Jesus sy missie om mense te red wat verlore is en openbaar die Vader se plan waarom Hy hierheen gekom het.

“Soek en red” is so ’n interessante frase en behels natuurlik om pro-aktief te wees teenoor verlore mense. Om te soek is om iets te probeer kry, maar dit lyk nie of dit ooit baie moeilik was om die verlorenes te vind nie. Die enigste Een wat kan red, is Jesus, maar Hy soek ook. Wanneer verlossing vir die verlorenes ons motivering word soos dit vir Jesus was, moet ons ook begin soek. Die vraag is dan: Hoe aggressief soek ons?

Dink aan wanneer jy ’n goeie TV-program soek om te kyk. Hoe benader jy dit om so iets te soek? Is daar enige dringendheid? Maak jy ’n plan? Heel waarskynlik is dit nie so dringend nie. Jy soek, maar dit is nie noemenswaardig nie. Dink nou daaraan om jou verlore motorsleutels te soek, of dalk die koning van almal: jou selfoon. Dit is waar soek ons nommer een prioriteit word. Alles anders stop wanneer ons hierdie items soek, want — vir die meeste van ons — gaan staan die lewe stil wanneer ons dit nie het nie. Dit word ’n realiteit, want daarsonder voel ons die verlies. Jy bereik die punt dat wanneer jy regtig wil hê iets moet gevind word, jy tot aksie moet oorgaan en sóék.

Ons moet kyk na hoe Jesus mense oorreed het. Toe Hy gesê het dat Hy gekom het om verlorenes te soek en te red, het Hy ons pas gewys hoe Hy ’n man met die naam Saggeus raakgeloop het. Dit is ’n goeie voorbeeld van wat dit beteken om te soek en hoe dit lyk.

Die eerste ding wat ons uit Jesus se voorbeeld kan neem, is dat Hy genoeg omgegee het om Saggeus werklik in ’n gesprek te betrek. Jesus is glad nie beïnvloed deur wat die skare gedink het nie en het vir hierdie ryk tollenaar gewys dat sy lewe betekenis het. Jesus het toe nog meer tot aksie oorgegaan en na sy huis toe gegaan. Sy missie was duidelik sigbaar deur hoe Hy hierdie een persoon, wat deur die meeste mense verag was, behandel het.

Kom ons begin soek en vertel vir hulle die verhaal van Jesus Christus, die enigste Een wat hulle kan red!