Առողջ Հոգի՝ Հաջողված ԿյանքՕրինակ

Հույսդ Աստծո՛ վրա դիր և Նրա՛ն հավատա

Սիրելի բարեկամ, այսօր Տերը տեսնում է քո հավատքը: Այն քեզ համար կարող է փոքր հավատք թվալ, Սակայն Տեր Հիսուսը երբեք չի ասել, որ ինչ-որ բանի հասնելու կամ Աստծուց ընդունելու համար մեծ հավատք է հարկավոր: Մանանեխի հատի չափ հավատը կարող է սարեր տեղաշարժել։

Ես երբեք չեմ դադարի շեշտել, որ դու քո հույսը պետք է Աստծո վրա դնես: Վստահիր Նրա կողմից դրված ծառայողներին ու մարգարեներին, սակայն հույսդ դիր միայն Ամենակարող Աստծո վրա, այլ ոչ թե մարդու:

Մեր Փրկիչ Տերը երբեք չէր անտեսում նրանց, ովքեր հավատք ունեին: Նա հավատք ունեցող մարդկանց էր փնտրում։ Իսկ երբ գտնում էր, ապա չէր կարողանում անտարբեր մնալ նման մարդու նկատմամբ և նրա կարիքների նկատմամբ։ Տեր Հիսուսը հաճախ հենց նման մարդկանց էր բժշկում։ Այդ առումով Նրա ամենասիրած արտահայտությունը հետևյալն էր. «Գնա՛ և ինչպես որ հավատացիր, այդպես էլ թող լինի քեզ» (‭‭Մատթեոս‬ ‭8.13‬):

Մի օր, երբ Տեր Հիսուսն ուսուցանում էր մարդկանցով լի մի տան մեջ, Նա լսեց, որ տանիքի վրա ինչ-որ իրարանցում է: Մարդիկ հեռացնում էին տանիքի գերանները, որպեսզի կարողանային մի անդամալույծ մարդու իջեցնել Նրա մոտ: Տեր Հիսուսի աչքի առջև բացվեցին տանիքի գերաններից մի քանիսը և ինչ-որ մեկին իջեցրին վերևից։ Եվ մինչև Տերը կտեսներ, թե ով է այդ մարդը, Նա մեկ ուրիշ բան տեսավ, ինչը միշտ փնտրում էր՝ նրանց հավատքը (Ղուկաս 5․20)։

Ես գիտեմ, որ դու ունես հավատք,սիրելի բարեկամ, և եթե քո թեկուզ փոքր հավատքը հպվի Տեր Հիսուսին, ապա այն, վստահաբար, բավարար է, որպեսզի հենց հիմա Նա շրջվի դեպի քեզ ու ասի. «Քո հավատը փրկեց քեզ»: Գնա՛ Տիրոջ առջև աղոթքով և հավատքով ստացի՛ր խնդրվածքիդ պատասխանը։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։

Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։

Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը