AZA MITENY TSIA FA MANAOVA ENY!

Tratry ny Krismasy!

Te hizara ny herin’ny “ENY” -nao aho. Rehefa miteny ENY amin’Andriamanitra ianao dia ireo fahafahana hiaina fahagagana dia afaka ny hitranga eo amin’ny fiainanao isan’andro. Ny vavako dia ny mba hisokafan’ny fonao amin’ny fotoanan’Andriamanitra sy ny ahitanao fa ny ENY-nao dia afaka mandrafitra ny lalanao ho amin’ny zavatra goavana.

Anio maraina dia niteny “ENY” tamin’Andriamanitra aho. Nikoropaka nandeha nividy zavatra vitsivitsy teny an-tsena aho no nisy vehivavy nanakana ahy raha iny izaho handeha hanokatra ny poketraka hiomana handoa vola, sy maika hiverina hiasa rahateo. Nanomboka nanontany zavatra betsaka ahy izy ary na tena tsapako hoe maika be aza aho, sy somary tsindrin-daona sy nitady ho leo dia nivavaka aingana aho niteny hoe “Andriamanitra o, ampio aho ho tonga fitahiana amin’izao minitra izao”. Rehefa voavaliko daholo ireo fanontaniany dia nitodika aho handeha handoa vola no niteny ialy caissier hoe “Nandritr’ianao niresaka taminy dia nisy lehilahy nandoa ny entanao rehetra”. Rehefa nitoditodika aho, sady taitra no tsy nino, dia tsy tazako teo intsony koa ilay vehivavy! Tena feno fankasitrahana aho noho ny fanomezana azoko. Ny ENY tamin’ireo fanontaniana vitsivitsy dia nanokatra varavaram-pitahiana GOAVANA be!

Afaka saininao ve hoe tahaka ny ahoana ny mety ho tsapan’i Maria, sivy volana mialohan’ny nahatongavan’i Jesosy? Hoy ny Baiboly hoe:

Ary nony niditra tao aminy ilay anjely, dia nanao hoe: Arahaba, ry ilay nohasoavina, ny Tompo momba anao. Ary taitra loatra izy noho ny teniny ka nieritreritra izay tokony ho hevitr'izany fiarahabana izany. Ary hoy ilay anjely taminy: Aza matahotra, ry Maria, fa efa nahita fitia tamin'Andriamanitra ianao.Ary, indro, hitoe-jaza ianao ka hiteraka zazalahy, ary ny anarany dia hataonao hoe Jesosy.Izy ho lehibe ka hatao hoe Zanaky ny Avo Indrindra (Lioka 1:28-32)

Tamin’io fotoana io dia afaka niteny i Maria hoe : “Misaotra fa..tsia!” Afaka nolavin’i Maria ny planin’Andriamanitra fa raha nanao izany izy dia tsy tafiditra tanatin’ny fahagagana lehibe indrindra nitranga hatrizay. Afaka navelan’i Maria ny tsy finoany handrava ny drafitra rehetra kanefa, dia nisafidy ny hino izy, ary nahatoky ary Andriamanitra nampiasa ny ENY-ny hanova izao tontolo izao. Henoy ange ny ENY avy amin’i Maria e:

“Dia hoy Maria: Inty ny ankizivavin'ny Tompo; aoka anie ho tonga amiko araka ny teninao. Dia nandao azy ilay anjely.” (Lioka 1:38)

Mety hoe nanana fanontaniana MAROBE i Maria fa nisafidy ny hiteny “ENY “ izy. Ity tovovavy miavaka ity dia tsy namela ny fisalasalana hihazona azy. Satria tokoa dia nivadika ho fiderana ny fisalasalana, ary ny sisa dia tonga tantaran’ny Krismasy.

Inona no afaka ataonao “ENY” anio? Inona ny planin’Andriamanitra mahagaga afaka handraisanao anjara hanaovanao “ENY” anio? Ny vavako ho anao anio dia ny handavanao hiteny ‘TSIA” ary handraisanao ny fahagagan’ny “ENY” izay hanova tanteraka ny fiainanao, ny fonao sy ny Krismasinao!

Aza adino fa afaka ny ho fahagagana ho an’ny olona iray ianao anio!

Fahagagana ny fisianao!

Eric