Andro faha 6

“Mission Impossible”

Ry namako, iza avy no nesorinao tamin’ny fiainanao?

Angamba misy dadatoanao iray izay eo amin’ny faha-70 taonany ary manao fihetsika toy ny mahafantatra tsara kokoa noho ny zava-drehetra. Rehefa maheno azy miresaka ianao dia toy ny hoe izy mihitsy no mpanjaka. Raha vao misy ny fanehoan-kevitra dia tsy maintsy maneho ny heviny ity dadatoa ity. Izay no izy, ary izany no mandamina azy! Ary ny finoana an'Andriamanitra? Tsotra fotsiny. “Tsy misy Andriamanitra!” hoy izy.

Amin’ny masom-pahitana dia ho "mission impossible" ho an'ity dadatoa ity ny hanolotra ny fiainany ho an'i Jesosy.

Tsy toy izany anefa ho an’i Jesosy.

Tsy misy “mission impossible” ho an’i Jesosy.

Tamin’ny fotoana tena nahaory Azy indrindra dia niresaka farany tamin’ny olombelona i Jesosy, ilay jiolahy teo amin’ny hazo fijaliana. Fantatr’ilay olon-dratsy izay nataony, nefa henony koa i Jesosy namela azy. Teo ny fiovana lehibe indrindra tamin’ny fiainany. Nandre an’i Jesosy namela ny mpamono Azy koa ilay jiolahy. Karazana olona manao ahoana re izany?

“...‘Jesosy ô, tsarovy aho, rehefa avy amin'ny fanjakanao Hianao..’ … ‘ Lazaiko aminao marina tokoa: Anio no hihaonanao amiko any Paradisa.’” (Lioka 23:42-43)

Feno rà ilay Lehilahy nihantona teo anilany, feno dian-kapoka sy ratra, feno voka-dratsin’ny ora fampijaliana niaretany, kanefa tao Aminy no nahitan’ilay jiolahy an’i Jesosy ho Mpanjaka.

Avy hatrany dia noraisin’i Jesosy izy, tahaka ny nandraisany ahy sy ianao.

Na dia “mission impossible” ho an’ny olon-drehetra aza, dia olombelona sarobidy teo imason’i Jesosy io mpanao heloka bevava io. Nafoin’i Jesosy ny fomba fisainan’ny fiaraha-monina sy ny fitondran-tena rehetra. Tia Izy.

Tsy "mission impossible" ianao na amin’ny lafiny inona na amin’ny lafiny inona.

Tsy manilika anao mandrakizay Andriamanitra. Tsy androany, tsy rahampitso, na oviana na oviana.

Amin’ny fahadisoanao rehetra, amin’ny lesoka rehetra, dia te hanome anao ny fiainana maha-mpanjaka Izy. Miainà ary mandehana amin'izany ary, ry namako!

Nosoloan’i Jesosy akanjon’ny fahamarinana ny lamba maloton’ilay mpangalatra. Tsy misy fepetra, ary maimaimpoana. Ny hany ilaina dia ny fanekenao izany.

Andao hiara hivavaka isika “Misaotra, Tompo ô, fa tsy nolavinao aho fa nanasa ahy hiara-monina Aminao mandrakizay Ianao. Misaotra Anao aho ny amin’ny fifaliana ateraky ny fiarahako aminao. Inty ny fiainako. Omeko Anao tanteraka izany. Amin’ny anaranao, amen.”

Feno hery ny fiainanao rehefa miaina ao anatin’ny faharesen-dahatra lalina ianao fa tsy misy “mission impossible” ho an’i Jesosy.

Fanontaniana hosaintsainina:

Amin’ny lafiny inona amin’ny fiainanao no mbola mampanahy anao fa ho lavin’Andriamanitra ianao ?

Iza avy ireo olona nosokajinao ho "mission impossible"? Ahoana no hampitomboanao finoana vaovao ho azy ireo?

Inona no mampahery anao momba ity tantaran’ilay jiolahy ity?

Inona no azonao atao mba hahatakarana marina fa fanomezana maimaim-poana ho an'izay REHETRA mino ny famonjena?

Tadidio…fahagagana ianao!

Namanao aho,