Mateo 6 मधील लोकप्रिय बायबल वचने

सामायिक करा

Qaq ÿoqo'oyi qami' ÿataqta ÿacteec qome da qadqochoqoi dam l'onataxanaxac ñi Dios da ilo'ogue 'enauacna, qataq da qau'ochi cam 'eetapeguec ñimayi, nachi ishit da qauacoñiiguet nataq'en 'enauac ne'enapi.

Qaq sa ishit qome da qami' ÿaquicoqchi't cam huaigui ca lÿa na'a'q. Cha'ayi ca lÿa na'a'q ÿataqteguet cam huaigui lqalaic. Qaq ñi 'oonolec na'a'q mashi 'eeso'oya' cam huaigui lqalaic.

Qaq ÿoqo'oyi nagui qami' shinapegalo da sa ishit qome da qami' ÿaquicoqchitta'pe cam qolliqui qataq cam qanÿomiigui mayi qaviñiitac, qataq cam qodogoxochi. Cha'ayi da achaalataxac sa ishit da 'eeta'am cam qanallic, qataq da n'oquiaxac sa ishit da 'eeta'am cam nogoxot.

Qalaxayi 'am da ivita da 'anatamen, qalaq 'aunoxonoigui ca 'adma'. Nachi 'auapogui ca lasom. Ime, qaq 'anqouagaxaunot ñim 'adta'a mayi saq cha'a, ñim 'am hueta'aguet. Nachi ñimayi mayi ÿaÿaten cam saq cha'a mayi 'au'ottac, ishit da ÿauo'o ca 'anshiitenaguec.

Qaq ÿoqo'oyi da qanqouagaxauñi, qalaq qoñiita': 'Am qadta'a Dios mayi qoneto'ot na piguem, 'enauac da qaÿi'oxoden da 'ad'enaxat. Ña 'anamaxaño' qome da 'ad'onataxanaxac, yaqto' i'ot ca qonetapeguec 'enauac nam huetalecna, 'eeta'am nam hueto'ot na piguem.

Ña qomi' 'anañanema na na'a'q ca sachiguenaq mayi souenaqtac.

'Auapalaxat qome da qadasouaxashit, 'eeta'ama qomi' da mashi sapalaxataq cam qomi' qai'oteque sa ÿaÿamaxañi.

Sa ishit qome da qomi' 'auashingueta ca qañi'iguenataguec, chaqdata da qomi' 'antelaqna'agueta ca sa ÿaÿamaxañi. Cha'ayi da 'ad'onataxanaxac, qataq da 'ad'añaxac, qataq da 'ayi'oxoyic nachi 'eetai' da qaica ca loga't. Aja', nachi 'eetec.

Cha'ayi da qami' qauchoxoyiñi cam sa ÿaÿamaxañi mayi qami' i'oteque cam qadÿai, nachi ishit da qami' ichoxode'n nataq'en ñi qadta'ai mayi neta'ague da piguem.

Ña qaumijñi na maÿo mayi huaÿotapeguelec na pa'ashiguem, da namayipi sa ishit da danaxan, qataq sa daqataxan, qataq sa ishit da chochi ÿaÿamaxat na ala ca languishic. Qalaxayi ñim qadta'ai mayi neta'ague da piguem, ñimayi ÿanem da lqui'axac namayipi. Qaq ¿qami' sa ishito' da qanapaquiÿalec nam maÿopi?

Sa ishit qome da ÿapacteec qalota da qadsallaqai qanqashiñi ana 'alhua, nam huaña da ishit da chic ca lalaxat, huo'otaq da chochi ltotañi ca camachaqca nogoxoshit, qataq ishit da decachiÿa ca cachaxaic. Chaqdato' da qauauo'oi ca qadsallaqai hua'ague da piguem mayi sa ishit da inoxoneu'a ca lalaxat da chic, huo'otaq da chochi ltotañi ca camachaqca nogoxoshit, qataq sa ishit da inoxoneu'a ca cachaxaic da decachiÿa. Cha'ayi qami' cam hueta'ague ca qadsallaqai, nachi nataq'en hueta'ague da qadquiyaqteÿaxaqui.

Qaica ca ishit da dos naq'en caua n'aco'yi. Cha'ayi ishit da ÿaÿimec ca lÿa, qataq ÿauotec ca lÿa, huo'otaq da ÿataqta ÿalaxaguet ca 'oonolec, qaq ca lÿa qalaq ÿataqta i'otan. Qaq nachi 'eetec da sa ishit da qai'onataxanot ñi Dios qataq acam yi'oqchigui plata.

Qaq ñi Dios da nachi 'eetec de'eda, da n'otaxanaxan anam huoue mayi huetauga nagui na n'onaxa, qamaq ca lÿa na'a'q nachi qaÿasaxangui ca nodec, qaq ¿sa ishito' da nachi 'eetec naq'en de'eda da qoñiita, qami' mayi saq 'amaqtaq da qadpi'iÿaxaqui?

Qalaxayi 'am da ivita da huo'o ca 'ai'ami' cam huo'o da lhuenaxanaxa, qalaq sa ishit da ivida'a da 'auaÿajnaxanaxanec cam 'adÿa mayi 'anauochaxaua. Chaqdata da 'oxotchiguiñi de'eda 'au'ot. Qaq ñim 'adta'a mayi ÿaÿaten cam saq cha'a, ñimayi ÿauo'o ca 'anshiitenaguec.

Sa ishit qome da qanachaxañiita da huo'otaq qau'ochi da qad'amqajnataxanaxaqui, da yaqto' qami' ÿauaachiguilo na shiÿaxauapi. Cha'ayi da nachi qoñiitec de'eda, nachi ñi qadta'ai mayi neta'ague da piguem, ñimayi sa ishit da ÿauo'o ca qanshiitenaguiiqui.

Qaq da ivita da qami' qanqouaqchichi, qalaq sa ishit qome da yi'oqta da daquico da qadashiguiÿaxaqui, da qoñiita'am nam shiÿaxauapi mayi chochi nachaxaata. Cha'ayi namayipi 'eetec de'eda, cha'ayi nshitaique da qaÿaÿaten da nqouaqchitta. Qaq aÿim qami' shinapegalo da namayipi sogote huo'o da nshiitenaguec. Qalaxayi 'am, da ivita da 'anqouaqchit, qalaq 'am 'anapilotta, qataq 'antacchiguiñi na 'adaue, yaqto' na shiÿaxauapi sa ishit da ÿaÿaten da 'am 'anqouaqchittapeguela't. Qaq chaqñita ñi 'adta'a Dios mayi 'am hueta'aguet, ñimayi 'am ÿaÿaten. Nachi ñimayi ÿauo'o ca 'anshiitenaguec.