Soma Biblia Kila Siku Agosti/2022Mfano

Watu wengi wa mataifa watajiunga na Israeli, kama unabii katika 8:23 unavyosema, Bwana wa majeshi asema hivi, Siku hizo watu kumi, wa lugha zote za mataifa, wataushika upindo wa nguo yake yeye aliye Myahudi; naam, wataushika wakisema, Tutakwenda pamoja nanyi, kwa maana tumesikia kwamba Mungu yu pamoja nanyi. Lakini siyo wote watakaojiunga. Kwa hiyo twasoma sasa jinsi Mungu atakavyohukumu mataifa ya jirani kwa sababu ya kiburi chao, kama anavyosema katika m.6, Mwana wa haramu atatawala huko Ashdodi, nami nitakatilia mbali kiburi cha Wafilisti. Hao waliotesa Israeli watakapoadhibiwa, italeta hali mpya kwa watu wa Mungu. Mwenyewe atakuwa ulinzi wao, na mtu awaoneaye hatapatikana tena kwao (m.8, Nami nitapiga kambi yangu pande zote za nyumba yangu ili kuwapinga adui, mtu awaye yote asipite ndani yake wala kurudi; wala mtu aoneaye hatapita tena kati yao; kwa maana sasa nimeona kwa macho yangu). Hivyo Mungu hataruhusu watu wake waangamizwe kabisa, kama vile Yesu alivyosema kuhusu Kanisa kwamba milango ya kuzimu haitalishinda (Mt 16:18).