ہر صبح خدا کی آواز سننانمونہ

خُدا اپنے دوستوں سے بات کرتا ہے

خُداوند نے کہا کہ جو کچھ میں کرنے کو ہوں کیا اُسے ابرہام [میرادوست اور خادم] سے پوشیدہ رکھوں؟   (پیدایش ۱۸ : ۱۷)

بائبل مقّدس میں ابرہام کے لئے سب سے زیادہ ’’خدا کا دوست‘‘ کا خطاب استعمال کیا گیا ہے۔ جہاں بائبل میں داوٰد کو جو ’’خُدا کے دِل کےموافق ایک شخص‘‘ کہا گیا ہے اور یوحنا کو ’’خداوند یسوع کا پیارا شاگرد‘‘ کہا گیا ہے، ابرہام کو یہ خاص شرف بخشا گیا ہے کہ اُسے صحائف میں ایک سے زائد جگہوں پرخُدا کا دوست کہا گیا ہے۔

جب خُدا نے سدوم اور عمورہ کی بدی کے باعث ان کو سزا دینے کا فیصلہ کیا اس نے ابرہام کو اپنے اس منصوبہ کے بارے میں بتایا۔

دوستی میں لوگ ایک دوسرے کو اپنے اِرادوں کے بارے میں بتاتے ہیں۔ کیونکہ خُدا ابرہام کو اپنا دوست سمجھتا ہے اس لئے جو کچھ وہ کرنے والا تھا اُس نے اُسے بتایا ۔۔۔۔۔۔ جیسا کہ آپ اپنے کسی دوست کواپنے ارادہ کے بارے میں بتاتے ہیں ۔ جب ابرہام نے سُنا کہ خُدا سدوم اورعمورہ کے خلاف تباہی کا اِرادہ رکھتا ہےتو ابرہام نے نزدیک جا کر کہا ’’کیا تو نیک کو بَد کے ساتھ ہلاک کرے گا؟‘‘ (پیدایش ۱۸ : ۲۳)۔ جیسا خُدا نے ابرہام کو اپنے ارادہ میں دوست کی حیثیت سے شامل کیا اسی طرح ابرہام خُدا کے نزدیک گیا اوراُس کے ساتھ بے دھڑک ہو کردلیری سے اُس کے منصوبہ کے بارے میں بات کی ۔۔۔۔۔۔ کیونکہ وہ دوست تھے۔ اُن کا ایک ایسا تعلق تھا جس میں وہ آزادی سے گفتگو کرسکتے تھے؛ اوربے دھڑک ہوکر بات چیت کرسکتے تھے۔ ابرہام خُدا سے جس قسم کی قربت سےلطف اندوز ہوتا تھا وہ اُس وقت آتی ہے جب ہم اُس کی مُحبّت میں محفوظ ہوتے ہیں۔

خدا آپ کا بھی دوست بننا چاہتا ہے ۔۔۔۔۔۔ آپ سے باتیں کرنا اور آپ کی سُننا چاہتا ہے کہ آپ کیا کہنا چاہتے ہیں۔ آج ہی بالکل نئے انداز سے اس حقیقت کو قبول کرنا شروع کردیں کہ آپ خُدا کے دوست ہیں اور یہ کہ آپ اس حیثیت میں اس کے پاس جاسکتے ہیں۔

آج آپ کے لئے خُدا کا کلام: خُدا کے ساتھ ایسا تعلق قائم کریں جس میں آپ اُس کے ساتھ آزادی سے گفتگو کرسکیں اور جو وہ آپ سے کہتا ہے اُسےآسانی سے سُن سکیں۔