Ìgbésẹ̀ Mẹ́fà Lọsí Ìdarí Tó Dára jùÀpẹrẹ

Ètò tí O lè Ṣẹ̀dá

Mofẹ́ kí o ronú nípa ìṣòro kan ní ibisẹ́, nínú ẹgbẹ́, nínú ilé, tàbí nínú ayéè rẹ tó máa ń jẹ yọ ní ìgbà-dé-ìgbà. O lè ni lérò wípé ìṣòro ìṣàkóso àmì-ẹ̀yẹ, ìtọ́jú oníbàárà, tàbí ti ilé tó dàrú ló jẹ́, ṣùgbọ́n lọ́pọ̀ ìgbà ìṣòro àìlétò ní máa ń fà á.

Gẹ́gẹ́bí adarí, ó máa ń rọrùn fúnwa láti fẹ̀sùn kan àwọn tó ń ṣiṣẹ́ lábẹ́ wa fún àwọn ìdojúkọ nígbà tí àìsí ètò láti ọ̀dọ̀ wa ló jẹ́ olórí ìṣòro. 

O tún lè máa rò ó wípé, “a kò ní ètò kan pàtó,” tàbí “bí iṣẹ́ ti ń wá ni a tií ṣeé: a kò nílò ìṣàkóso nípa ètò.” Ṣùgbọ́n, kò sí ẹnìkan tí kò ní ètò. Ètò tìrẹ lè jẹ́ ṣíṣe àyẹ̀wò àwọn íméelì ní òwúrọ̀, yíyanjú ìṣòro bí wọ́n ti ń yọjú sí ọ, kí o sì wá darí sílé lẹ́yìn tó ti rẹ̀ ọ́ teyín-teyín. Ètò kan náà nìyẹn.

Àwọn ètò wà tí a gbé kalẹ̀ tàbí tó kàn ṣúyọ fúnra rẹ̀, ọ̀nà-kọnà tí kò báà jẹ́, ètò kò ṣeé gbá ṣẹ̀gbẹ́. Ètò tí ò ń tẹ̀lé lè wáyé nítorí o ṣe àgbékalẹ̀ rẹ̀ tàbí nítorí o gbà á láàyè. Nítorí náà, tí o bá fẹ́ àbájáde tó dára ju àtẹ̀yìnwá lọ, bẹ̀rẹ̀ ètò tó dára ju èyí tó wà tẹ́lẹ̀. 

Nínú oríi Bíbélì tí ó ṣáájú, ayé wà ní júujùu, Ọlọ́run sì pàṣẹ pé, “kí ìmọ́lẹ̀ kí ó wà.” Ó sì wá tẹ̀síwájú láti ya ìmọ́lẹ̀ àti òkùnkùn sọ́tọ̀, ayé àti ọ̀run sọ́tọ̀, ilẹ̀ àti omi sọ́tọ̀, ẹyẹ àti ẹja sọ́tọ̀, àti bẹ́ẹ̀ bẹ́ẹ̀ lọ. Ó ṣeé ṣe kí o ṣe àkíyèsí wípé Ọlọ́run máa ń yanjú àwọn ètò kan papọ̀ kí ó tó tẹ̀síwájú. Lákòótán, Ọlọ́run dá ènìyàn ó sì fún wọn ní ìtọ́ni nípa ìtọ́jú ohun gbogbo—pẹ̀lú àfikún ètò ìsinmi ẹ̀kan l'ọ́sẹ̀. 

A bẹ̀rẹ̀ ìṣẹ̀dá pẹ̀lú ètò. Àpọ́sítélì Pọ́ọ̀lù pe Ìjọ náà ní ara kan pẹ̀lú ọ̀pọ̀lọpọ̀ ẹ̀yà tó ní iṣẹ́ kan pàtó tí wọ́n ńṣe. Ètò nìyẹn. Ètò tó ní adarí tí ó yanjú—èyí tí í ṣe Jésù. 

Bó ti rí nínú ayé, nínú Ìjọ, nínú araà rẹ, kìkìdá ètò ni ìgbésí ayé rẹ jẹ́. A kìí ṣe kòńgẹ́ ètò dídára. Ní ṣeni a máa ń dìídì ṣe àgbékalẹ̀ rẹ̀. 

Àgbékalẹ̀ ètò wo lo nílò láti ṣe fún èsì tí o fẹ́? 

Gba èyí rò: Ǹjẹ́ mo ti fi Jésù ṣe adarí pònkárí ètò mi—èyí tí í ṣe ayé mi? Àwọn rúkè-rúdò wo ni mò ń kojú, àti wípé irú ètò wo ni yóò mú mi borí wọn?