Stinët e zemrësShembull

Dashuria për kombet e tjera

Por Shkrimi, duke parashikuar se Perëndia drejtëson kombet prej besimit, ia dha më përpara Abrahamit lajmin e mirë: "Të gjitha kombet do të bekohen në ty". - Galatasve 3:8

Sa i ëmbël është Ungjilli në zemrën e besimtarit! Sa e gjallëron mëkatarin e pikëlluar Fjala e pastër e së vërtetës dhe e inkurajon atë që t'i drejtohet Qengjit të Perëndisë për falje dhe shenjtërim! Por pjesa më e madhe e banorëve të tokës janë privuar nga ky Ungjill i lavdishëm, i cili u zbulon atyre rrugën e shpëtimit. “Kur nuk ka një vizion profetik, populli bëhet i shfrenuar”. Mijëra shpirtra të pavdekshëm po hyjnë në përjetësi dhe po mbushin mbretëritë e errëta të mjerimit. Nëse shpirtrat tanë kanë një rëndësi më të madhe sesa kjo botë bashkë me gjithë thesaret e saj lëvduese, atëherë si mund ta llogarisim vlerën e këtyre miliona shpirtrave të humbur që janë po aq të çmuar sa tanët?

Që nga fëmijëria ne e kemi mbajtur Biblën në duart tona dhe çdo shabat jemi udhëzuar rregullisht nga ky vëllim i çmuar. Ne kemi miq besimtarë me të cilët mblidhemi dhe gëzojmë urdhëresat e shpallura të Ungjillit. Por kombet e tjera nuk kanë privilegje të tilla. A kemi sadopak dashamirësi për ta? A jemi mjaftueshëm të ndjeshme që të ndiejmë shqetësimet e njerëzve të tjerë?

Ndërsa çmojmë shpëtimin që ofron Shpëtimtari, e ndërsa çmojmë lotët, veprat dhe vdekjen e Tij, le të pyesim me shumë sinqeritet se çfarë do të bëjmë ne tani për shpëtimin e kombeve të zhytura në errësirë. Nëse nuk na lejohet t'i vizitojmë vetë dhe t'u deklarojmë atyre efektshmërinë e gjakut të Shpëtimtarit, ajo çfarë mund të bëjmë është të lutemi me shumë zell për ta. Nuk është gjë e vogël të dimë se kur i gjithë universi të qëndrojë i mbledhur para fronit të Perëndisë, ne do t'i takojmë ata dhe atje do të na duhet të japim llogari për mënyrën si jemi sjellë ndaj tyre në këtë botë.

Harriet Newell