Stinët e zemrësShembull

Huall mjalti i kënaqësisë

Por meqë Zoti ju do. - Ligji i Përtërirë 7:8

Perëndia im i hirshëm, ekziston një huall mjalti kënaqësie dhe ëmbëlsie në këto fjalë: “por meqë Zoti ju do”. Kjo është arsyeja e Tij e madhe për të gjitha marrëdhëniet që ka me të vetët. Është një përgjigje e plotë dhe bindëse ndaj të gjitha dyshimeve dhe pyetjeve me të cilat Satani mund të hutojë dhe shqetësojë të ndrojturit e Zotit. Për fat të keq, armiku i shpirtrave tanë dhe mosbesimi ynë i lig i strehuar brenda nesh, bashkohen fuqishëm, por që të dy këta do të mposhten kur ne të mësojmë ta përdorim këtë armë lufte kundra tyre.

Eja, zemra ime, provo forcën dhe vlerën e saj të bekuar në këtë moment! Armiku thotë: “Përse Perëndia ju dërgon fatkeqësi, trishtim dhe vuajtje, kur ata që nuk i druhen emrit të Tij kanë qetësi të vazhdueshme dhe mirëqenie me bollëk?” Nëse mund të përgjigjesh me guxim “për shkak se Zoti më do”, ti do t'i ngulësh atij një shpatë të tillë që do të të çlirojë nga mjetet e tij dinake dhe sulmet e furishme të paktën për pak kohë.

Ose, vëzhgo Shkrimin si një rreze dielli që depërton përmes një të çare në dritaren me grila të një përvoje të errët. Nxirri frikërat dhe parandjenjat e tua nga qoshet e errëta dhe vendosi brenda rrezatimit të kësaj drite dashurie. Do të habitesh kur t'i shohësh të shndërruara në besime të forta. Dyshimet e tua do të zhduken sikur të mos kishin qenë kurrë dhe përvojat e liga dhe të hidhura të jetës do të shndërrohen të gjitha në bekime në një moment. “Por meqë Zoti ju do” është një çelës kryesor që i përshtatet pyetjeve më të vështira dhe që hap misteret e problemeve më të thella. Çelës ky me një efektshmëri të mrekullueshme dhe që çdo besimtar në Zotin Jezus Krisht jo vetëm që mund të gëzohet që e ka në zotërim, por edhe ta përdorë atë vazhdimisht për të marrë dëshirat zemrës së vet në gjërat shpirtërore.

Susannah Spurgeon