Soma Biblia Kila Siku Agosti 2021Mfano

Tukikosa kuwa waaminifu, Mungu hubaki mwaminifu daima: Kama sisi hatuamini, yeye hudumu wa kuaminiwa. Kwa maana hawezi kujikana mwenyewe (2 Tim 2:13). Somo la leo hutufundisha maana yake. Mungu ni wa ahadi, na ahadi zake ni za kweli. Aliwapa Waisraeli nchi aliyowaahidi. Sasa wako uhamishoni kwa sababu ya dhuluma zao nyingi (hiyo inadokezwa katika m.8-10, kwa mfano maneno haya, Iwatoshe ninyi, enyi wakuu wa Israeli; ondoeni dhuluma na unyang'anyi; fanyeni hukumu na haki; ondoeni kutoza kwa nguvu kwenu katika watu wangu, asema Bwana MUNGU). Lakini Mungu atawarudisha. Basi, watakapoigawanya nchi tena, lazima wakumbuke: 1) Kumpa Mungu nafasi ya kwanza: Mtakapoigawanya nchi kwa kura iwe urithi, mtamtolea Bwana toleo, sehemu takatifu ya nchi (m.1). 2) Kuwapa watumishi wa Mungu nafasi ya kumhudumia kwa haki: Hiyo ni sehemu takatifu ya nchi; itakuwa ya makuhani, wahudumu wa patakatifu, wakaribiao kumhudumia Bwana; nayo itakuwa mahali kwa nyumba zao (m.4). 3) Kumtolea Mungu ili huduma hiyo itendeke: Toleo mtakalotoa ni hili … (m.13nk).