Soma Biblia Kila Siku Agosti 2021Mfano

Injili ni siri, yaani, haijitokezi moyoni mwa mtu bali inafunuliwa na Roho Mtakatifu. Ndivyo ilivyo hadi leo. Kwa hiyo ni kazi ya Wakristo kumtangaza Yesu Kristo ili isiwe siri, bali iwe habari njema kwa kila mtu. Mungu kwanza alimtumia Paulo, na kwa njia hii hata sisi tumepata kuisikia habari ya neema. Sasa Mungu anataka atutumie sisi tuliopo duniani kwa ajili ya kueneza Injili kwa watu wote, wala si kwa kabila letu tu. Na katika hili, vipawa vyetu ni tofauti. Zingatia maelezo katika 1 Kor 12:1-4, Ndugu zangu, kwa habari ya karama za roho, sitaki mkose kufahamu. Mwajua ya kuwa mlipokuwa watu wa Mataifa, mlichukuliwa kufuata sanamu zisizonena, kama mlivyoongozwa. Kwa hiyo nawaarifu, ya kwamba hakuna mtu anenaye katika Roho wa Mungu, kusema, Yesu amelaaniwa; wala hawezi mtu kusema, Yesu ni Bwana, isipokuwa katika Roho Mtakatifu. Basi pana tofauti za karama; bali Roho ni yeye yule.