Soma Biblia Kila Siku Novemba 2021Mfano

Kwa kuzaliwa, Daudi ni mtu wa kawaida tu, ni mwana wa Yese (m.1). Ukuu wake umetokana na Mungu kumchagua kwa kazi ya mfalme, kama Daudi mwenyewe anavyoshuhudia. Ni aliyeinuliwa juu ... masihi wake Mungu (m.1). Sifa yake pekee ni nyimbo zake nyingi za kumwimbia Mungu. Kwa muziki na nyimbo zake, Daudi aliweka msingi mzuri sana wa ibada katika taifa la Mungu (1 Nya 23:5, Walimsifu Bwana kwa vinanda, nilivyovifanya, alisema Daudi, vya kumsifia. 2 Nya 29:25-30, Hata walipokwisha kutoa sadaka, mfalme, na hao wote waliokuwapo naye, wakasujudia, wakaabudu ... Wakaimba sifa kwa furaha, wakainama vichwa, wakaabudu). Sifa atoazo Daudi juu ya mfalme mwema (m.2-4) na tumaini lake katika ahadi ya Mungu (m.5) yanahusu kipekee Masihi ajaye, yaani, Kristo Yesu! Ndiye atawalaye waandamu kwa haki, akitawala katika kicho cha Mungu, atakuwa kama nuru ya asubuhi.