Soma Biblia Kila Siku 09/2025Mfano

Kumfuata Yesu Kristo si lelemama. Kunahitajika kujitoa mhanga na kutiana moyo. Kuna mateso, mahangaiko na kukata tamaa. Katika dunia ya sasa inayojaa maneno, mawazo na matendo ya kukatisha tamaa, ni rahisi kudhani Mungu hayupo au amechoka. Somo la leo linatukumbusha kuwa yu hai, naye niMungu wa faraja yote(m.3). Yesu Kristo yupo upande wetu, tusikate tamaa wala kufa moyo. Ndivyo tunavyokumbushwa katika Rum 8:31-39: Mungu akiwapo upande wetu, ni nani aliye juu yetu? Yeye asiyemwachilia Mwana wake mwenyewe, bali alimtoa kwa ajili yetu sisi sote, atakosaje kutukirimia na mambo yote pamoja naye? Ni nani atakayewashitaki wateule wa Mungu? Mungu ndiye mwenye kuwahesabia haki. Ni nani atakayewahukumia adhabu? Kristo Yesu ndiye aliyekufa; naam, na zaidi ya hayo, amefufuka katika wafu, naye yuko mkono wa kuume wa Mungu; tena ndiye anayetuombea. Ni nani atakayetutenga na upendo wa Kristo? Je! Ni dhiki au shida, au adha, au njaa, au uchi, au hatari, au upanga? Kama ilivyoandikwa, ya kwamba, Kwa ajili yako tunauawa mchana kutwa, Tumehesabiwa kuwa kama kondoo wa kuchinjwa. Lakini katika mambo hayo yote tunashinda, na zaidi ya kushinda, kwa yeye aliyetupenda. Kwa maana nimekwisha kujua hakika ya kwamba, wala mauti, wala uzima, wala malaika, wala wenye mamlaka, wala yaliyopo, wala yatakayokuwapo, wala wenye uwezo, wala yaliyo juu, wala yaliyo chini, wala kiumbe kinginecho chote hakitaweza kututenga na upendo wa Mungu ulio katika Kristo Yesu Bwana wetu. Waombee waliao na wanaoelekea kukata tamaa. Uwashirikishe pia Mungu alivyokufariji wewe.