Gewilde Bybelverse vanaf JESAJA 60

Deel

“Staan op, Jerusalem, laat jou lig skyn sodat alle volke dit kan sien! Want die HERE se heerlikheid skyn op jou.

Nasies sal stroom na jou lig, en konings na die glans van die nuwe dag wat vir jou aangebreek het.

Duisternis kom oor die aarde, donkerte oor al die nasies, maar oor jou gee die HERE lig, oor jou verskyn sy teenwoordigheid.

Die kleinste onder hulle sal duisende word, die swakste ’n sterk nasie. Ek is die HERE. Wanneer die tyd daarvoor kom, sal Ek dit doen.”

Bedags sal dit nie die son wees wat vir jou lig verskaf nie, en snags sal jy nie die maan nodig hê vir lig nie, want die HERE sal vir altyd jou lig wees, en jy sal roem in jou God.

Jou son sal nooit weer ondergaan, of die maan afneem nie. Want die HERE sal jou lig wees vir altyd. Jou dae van hartseer het op ’n einde gekom.

Jy sal dit sien, jou oë sal blink, en jou hart sal bons van vreugde, want handelaars van oor die hele wêreld bring hulle skatte na jou, die rykdom van baie lande.

Kyk rondom jou. Hulle kom almal bymekaar. Jou seuns kom uit ver lande. Jou dogtertjies word op die heup gedra.

Al jou inwoners sal regverdig wees. En hulle sal die land vir altyd besit, want Ek sal hulle met my eie hande plant, om my roem te vermeerder.

Geweld sal verdwyn uit jou land, ja, ondergang en verwoesting van binne jou grense. Redding sal om jou wees soos stadsmure, en almal wat die stad binnekom, sal My loof.

Jou stadshekke sal heeldag en heelnag oop wees, sodat die rykdom van die nasies na jou gebring kan word en die konings in ’n triomftog die stad binnegelei sal word.

Troppe kamele kom na jou toe, jong kamele uit Midian en Efa. Almal wat uit Skeba kom, bring goud en wierook om daarmee die lof van die HERE te besing.

“Vreemdes sal jou stede herbou, hulle konings sal tot jou diens wees. Ek het jou in woede gestraf, maar in my genade sal Ek My oor jou ontferm.

“Waar jy voorheen verstoot is, gehaat en deur almal vermy, gee Ek jou nou blywende roem, en maak Ek jou ’n vreugde, geslag na geslag.

Jy sal die melk van nasies drink, aan ’n koninklike bors drink. Dan sal jy weet dat Ek, die HERE, jou Redder en Verlosser, die Magtige van Jakob is.