Kom Ons GaanVoorbeeld

Voor Ons Begin ...

Kom Ons Gaan is 'n 21-dag oordenking wat bedoel is om jou aan te moedig en te inspireer om Jesus se sendingopdrag uit te voer: “Gaan uit, die hele wêreld in, en verkondig die evangelie aan die hele mensdom ..." (Markus 16:15).

Wanneer ons daaraan dink om te "gaan", is dit maklik om dadelik te begin dink om alles wat ons besit op te pak en die pad te vat na 'n vreemde land om as 'n sendeling te gaan werk. Terwyl dit 'n gedeelte daarvan is, is dit nie al waaroor dit gaan nie.

Om te gaan is om eenvoudig verder te reik as onsself — om in geloof uit te stap terwyl God lei. Dit is om uit ons gemaksone te beweeg en ons geloof buite die vier mure van ons kerkgeboue en huise te neem. Dit gaan oor die verkondiging van die boodskap van Jesus se goeie nuus in ons woonbuurte, ons werkplekke, ons skole, ons stede, ons land en regoor die wêreld. Dit gaan oor gehoorsaamheid aan God se oproep en om in vennootskap met Hom uit te gaan om ons kultuur — ons wêreld — van duisternis en sonde te verlos.

Oor die volgende 21 dae sal jy verhale lees van mans en vroue wat Jesus se oproep gehoorsaam het om uit te gaan. Jy sal sien hoe God hulle bereidwilligheid gebruik het om lewens regoor die wêreld te herskep. Vir sommige was dit so eenvoudig soos om iemand 'n drukkie te gee. Vir ander het dit behels dat hulle hul familie, vriende en huise verlaat het om in 'n ander land te dien. Die enkele gemeenskaplike element regdeur al hierdie ware verhale oor regte mense, is dat elke persoon God gehoor het, Hom geglo het en sy oproep gehoorsaam het om uit te gaan. Ons gebed is dat jy deur hierdie verhale geïnspireer, uitgedaag en uiteindelik gemotiveerd sal wees om te gaan.

Voordat jy elke dag begin, moedig ons jou aan om die Here te vra om jou geestelike oë en ore oop te maak vir alles wat Hy vir jou wil sê en jou wil wys. Vra Hom om jou hart te breek vir die dinge wat Syne breek. Wees dan bereid om Hom te vertrou en uit te gaan.

Op julle merke? Gereed? Gaan!

DAG 1 | Wat Het Jy in Jou Hand?

Deur S. George Thomas

Dit was maar net nog 'n gewone dag. Niks spesiaals nie. Niks buitengewoon nie. Vir Moses was dit maar net dieselfde roetine as die afgelope 40 jaar: Word wakker. Sorg die hele dag vir die skape. Gaan bed toe. Begin die volgende dag weer van vooraf. Sy jare van grootword as 'n prins in die farao se paleis op die pragtige oewers van die Nyl moes soos in ‘n ander leeftyd gevoel het. Nou het sy dae bestaan uit die versorging van sy skoonvader se kuddes skape op die droë en stowwerige woestynvlaktes van Midian. Op 80-jarige ouderdom was sy lewe verby. Watter drome hy ook al ooit gehad het, was nou lankal iets van die verlede.

Dit was nie 'n aaklige lewe nie. Trouens, dit was eintlik vreedsaam. Ten spyte van sy opvoeding en geleerdheid het Moses sy lot in die lewe aanvaar en homself daarby berus. Toe het hy op 'n brandende bos afgekom. Uit hierdie bos het God hom 'n vraag gevra en die lewe soos Moses dit geken het, het vir altyd verander.

Die gesig van 'n bos wat in die woestyn brand, het waarskynlik nie vir Moses vreeslik geskok nie. Toe die bos egter aanhou brand sonder om uit te brand, is sy nuuskierigheid geprikkel, en hy het nader gekom om ondersoek in te stel. Op daardie oomblik het Moses God se stem van binne die brandende bos gehoor wat hom op sy naam geroep het.

Stel jou voor hoe Moses gevoel het toe God vir hom sê Hy het die pyn van sy volk in Egipte gesien en hulle uitroepe om verlossing gehoor, en Hy wou hê Moses moes hulle uit Egipte lei! Hy het 40 jaar lank niks anders as skape gelei nie. Is dit enige wonder dat Moses geantwoord het: "... Sê nou die Israeliete glo my nie en hulle luister nie na my nie en hulle sê die Here het nie aan my verskyn nie?"

Weet jy hoe God besluit het om Moses se vraag te beantwoord? Met 'n oënskynlik onverwante vraag van sy eie: “… Wat het jy in jou hand?"

Moses moes gewonder het waarom God hierdie vraag sou vra waarop Hy uiteraard die antwoord geken het, maar hy het eenvoudig geantwoord: "... 'n Kierie... " En toe het God beveel: “… Gooi die kierie op die grond! ...” Moses het dit op die grond gegooi, en sowaar, dit het in 'n slang verander! Natuurlik wou Moses omdraai en weghardloop; dit wil sê, totdat hy in sy spore gestuit is deur God se bevel om die slang aan sy stert op te tel. Met 'n aansienlike hoeveelheid senuweeagtigheid het Moses versigtig sy hand uitgesteek en die slang aan sy stert opgetel, en dit het dadelik weer 'n kierie geword.

Ons weet nie hoe lank Moses daardie spesifieke kierie gebruik het nie, maar dit is moontlik dat dit al 'n geruime tyd was. Heel waarskynlik het hy redelik vertroud geraak met al die kierie se klein kepe en groewe, en met verloop van tyd het die hout waarskynlik verweer tot op die punt waar dit nou glad en heeltemal tuis in sy hand was. Sy kierie het soveel meer as net 'n wandelstaf verteenwoordig. Eerstens verteenwoordig dit sy identiteit. Net soos 'n stetoskoop 'n dokter verteenwoordig of 'n gereedskap-gordel wat 'n werktuigkundige verteenwoordig, was Moses se kierie die mees herkenbare simbool van sy beroep as herder — sy loopbaan, sy werk. Tweedens, dit was 'n simbool van sy inkomste. In daardie dae het mense nie bankrekeninge, kredietkaarte of verskansingsfondse gehad nie ... hulle het beeste, bokke en skape gehad. As herder van sy skoonvader se kuddes, was Moses se inkomste — sy geld en besittings — onlosmaaklik gekoppel aan sy posisie. Die derde ding wat die kierie gesimboliseer het, was Moses se invloed. Want wanneer 'n herder sy kierie gebruik om skape van punt A na punt B te verskuif, is hy in wese besig om sy invloed uit te oefen.

Toe God dus vir Moses gevra het, "Wat het jy in jou hand?" en vir hom gesê het om sy kierie "op die grond te gooi," het Hy eintlik gesê, "Gaan jy jou identiteit neerlê? Jou inkomste prysgee? Jou invloed laat vaar? Want as jy dit doen, sal ek iets neem wat vir jou dood lyk, en Ek sal dit lewendig maak. Ek sal 'n wonderwerk daaruit voortbring. Dit mag dalk vir jou soos 'n onbeduidende stuk hout lyk, maar as jy dit in my hande oorgee, sal ek dinge doen wat jy nooit sou kon dink moontlik is nie."

Die vraag wat God Moses soveel jare gelede gevra het, weerklink vandag nog net so sterk: Wat het jy in jou hand? Jou talent, agtergrond, opleiding, vryheid, gesondheid, kontakte, geleenthede, verstand, passies, rykdom, idees, kreatiwiteit ... Wat het jy in jou hand?

Die eerste stap om uit te gaan, lê daarin om oor te gee. Voordat ons kan "gaan", wil God hê ons moet "laat gaan" ... om totaal, heeltemal, onvoorwaardelik, absoluut elke liewe dag aan Hom oor te gee.

Vra jouself dus vandag af: "Wat is in my hand?"

God kan jou nie seën soos Hy wil nie voordat jy eers die ander dinge neersit wat jy in jou hande vasklou nie.
~ Richard Stearns

Memoriseer Vers

"Ek sal aan jou die sleutels van die koninkryk van die hemel gee, en wat jy op die aarde toesluit, sal in die hemel toegesluit bly; en wat jy op die aarde oopsluit, sal in die hemel oopgesluit bly" Matteus 16:19.