Ewige VerbondVoorbeeld

Lees: Eksodus 24:3-8; Matteus 5:17-20

SOAP: Matteus 5:17

“Moenie dink dat Ek gekom het om die wet en die profete ongeldig te maak nie. Ek het nie gekom om hulle ongeldig te maak nie, maar om hulle hulle volle betekenis te laat kry.”

Oordenking

Nadat die Israeliete die wet ontvang het, het hulle dadelik belowe om gehoorsaam te wees en terstond die wet nagekom. Dit het egter nie lank geduur voordat hulle gefaal het nie. Ons is dieselfde. Ons belowe gou om gehoorsaam te wees en skiet dan te kort. Vanweë sonde is ons nie in staat om die wet volmaak te onderhou nie. Sonde het hierdie vermoë in ons geruïneer, maar nie alles is verlore nie.

Toe Jesus gekom het, het Hy nie gekom om van die wet ontslae te raak nie, maar om dit te vervul. Hy het aan die vereistes van die wet voldoen. Hy het die bedoeling van die wet vervul, en Hy het dit vir ons gedoen. Nie net is ons sondes vergewe nie, maar ons het die geregtigheid van Jesus ontvang. Hy het die wet vir ons nagekom omdat Hy geweet het dat ons nie kon nie.

Dit beteken nie dat ons nie moet probeer om die wet te onderhou nie. As ons die Here liefhet, sal ons gehoorsaam wil wees; gehoorsaamheid is ‘n teken van ‘n hart wat verander is. Danksy Christus kan die wet ons nie meer veroordeel nie. In plaas daarvan wys dit vir ons hoe ons behoort te lewe en dit wys ons heen na Jesus.

Gebed

Here, U is vol genade en barmhartigheid. Ons verdien nie wat U alles vir ons gedoen het nie, en ons is dikwels nie erkentlik genoeg nie. Vergewe asseblief ons ondankbaarheid. Raak ons harte aan om in verwondering teenoor u liefde en omgee vir ons te wees.