In Die Stilte Van Die MôreVoorbeeld

’n Gebed oor VERANDERING

Wanneer ek al die veranderings in my lewe moet hanteer

Goeie en genadige God, ek wil iets beklemtoon waarvan almal bewus is: Verandering is stresvol! Ek weet dat verandering een van die groot sekerhede in die lewe is, maar dit maak dit geensins makliker nie. 

Hetsy dit groot of klein is, ek ervaar aanmekaar verandering. Mense verander, verhoudings verander, werk verander. Ek weet party veranderings is positief – dankie vir daardie veranderings! Ander veranderings lyk negatief, en ek moet leer om dankie te sê vir hulle ook. Ek is dankbaar dat U beloof om selfs die moeilikste dinge wat met my kan gebeur te hanteer. En ek dank U dat wanneer ek deur traumatiese verandering gaan, U my herinner dat U onveranderlik en betroubaar is.

Vader, daar is een groot verandering wat U van my verwag, en dit is ’n innerlike verandering van my hart wat berou genoem word. Bewerk asseblief hierdie radikale verandering in my hart sodat die rigting van my lewe vir ewig ten goede sal verander.