In Die Stilte Van Die MôreVoorbeeld

’n Gebed oor BEKOMMERNIS

Waar kan ek vrede vind wanneer bekommernis my oorweldig?

Here God, U is deeglik bewus van my angstige hart. Ek erken dat ek my oor byna alles bekommer, en ek weet dat dit die verkeerde aanwending is van die verbeelding wat U vir my gegee het. Die meeste van die dinge waaroor ek my bekommer, gebeur nooit eens nie. Wanneer ek my dus bekommer, mors ek my tyd en emosionele energie onnodig.

Here, ek wil op U vertrou. Verander asseblief my angstige hart na ’n vredevolle hart. Wanneer bekommernis my oorweldig, herinner my om daardie angstige gedagtes in gebede te verander waardeur ek my bekommernisse vir U gee. Help my dan om hulle te laat vaar in die besef dat daar geen probleem is wat U nie kan oorwin nie. Help my om vrede te vind in die wete dat U vir my sorg. Wanneer ek op U vertrou, hoef ek my nie te bekommer nie. Dankie daarvoor, Here.

Hierdie oordenkings is saamgestel uit IN DIE STILTE VAN DIE MÔRE © Christelike Uitgewersmaatskappy.