In Die Stilte Van Die MôreVoorbeeld

’n Gebed vir RUS

Wanneer die trapmeul van die lewe my uitput

O Here, my wêreld van aanhoudende beweging skep ’n lewe van angs en stres. Ek vertel sowaar soms met trots vir ander hoe besig ek is, en ek voel skuldig as ek tot stilstand kom om te rus.

U het egter nie bedoel dat mense in ’n toestand van gejaagde aktiwiteit moet lewe nie. Uit u eie voorbeeld terwyl U hier op aarde was, is dit duidelik dat U wil hê ons liggaam en siel moet verkwik word. Waarom sou die alomteenwoordige God van die heelal gerus het nadat Hy die skeppingswerk afgehandel het? Dit was sekerlik nie omdat U, die Almagtige, moeg was nie! Die antwoord wat ek sien, o God, is dat U, deur ’n ruskans van u werk te neem, rus as heilig verklaar het. U het ons op so ’n manier gemaak dat ons moet ophou werk om na ons fisieke en geestelike behoeftes om te sien.

Ek weet werk is goed en dit bring soveel voordele in my lewe. Maar ek weet ook dat U wil hê my werk moet gebalanseer word met gereelde rus en aandag aan my liggaamlike en geestelike gesondheid. Andersins sal ek energie kortkom en kosbare oomblikke van stiltetyd saam met U misloop.

Here, leer my hoe om te rus.