Elke Dag Saam Met GodVoorbeeld

Waarin vind jy vreugde?

Vóór 2020 was die woord “inperking” of “grendeltyd” nie deel van ons woordeskat nie. Toe tref dit ons, saam met die navorsing oor hoe so ’n tyd mens beïnvloed. Hierdie navorsing het bevind dat mens veral twee gemoedstemmings tydens lang inperking ervaar. Ons kyk vandag na die eerste een: ’n lae gemoed, terneergedruktheid, sommer net áf voel. Dis heeltemal normaal. Omdat mens ’n klomp vreugdes mis en baie goed nie mag doen nie, is jou bronne vir lewensvreugde minder. Dit voel tog maar ’n bietjie soos tronk. Hoe hanteer mens dit?

Ons lewensdoel is nie om áltyd vrolik te wees nie, maar ons wil darem vreugde beleef. Vreugde is mos darem ook ’n vrug van die Gees (Gal. 5:22). ’n Emosie soos vreugde kan nie aangeskakel word soos ’n skakelaar nie. Dit kan slegs gekweek word deur dade en wilsbesluite. Daarom moet jy jou dae só beplan dat jy met dáde vreugde kweek. Vaste ritmes van iets sinvols doen, iets lekkers en iets ontspannends. As jy sekere lekker dinge nie kan doen nie, doen doodgewoon jou pligte, want dit gee oomblikke van vreugde. As jy genoeg sulke oomblikke het, sal die dag sommer beter wees.

Lees Psalm 119:35. Doodgewone gehoorsaamheid aan God se gebooie gee vreugde wanneer ek vanaand gaan slaap.