Elke Dag Saam Met GodVoorbeeld

’n Mengelmoes lekker emosies: Lag is gesond

Hoekom is hierdie emosie van lag so belangrik? Want dit is so gesond. Lag skei sekere baie gesonde neuro-oordragstowwe in jou brein af. Dit beveg skadelike emosies soos stres, depressie en angs. Dit verbeter jou immuunstelsel en gesondheid.

Die Bybel gee ons rede (en die opdrag) om die basiese emosie wat tot lag lei te kweek, naamlik blydskap en vreugde. Vreugde is die seker wete dat dinge in jou lewe in orde is, dinge met God, met jou medemens en met jouself. Wanneer ek in ’n situasie van vreugde en vrede leef, is humor maklik. Dan lag ek makliker as wanneer ek onder stres en onvrede leef. Humor – lag – is dan dit wat mens sien, die punt van die spreekwoordelike ysberg, en vreugde en vrede is die gedeelte onder die water. 

Maak dus eers jou verhouding met God reg: “Laat jul met God versoen!” En soek dan genoeg gesonde lekkerlag-geleenthede. Maak grappies met mekaar, kyk snaakse programme, hou kinders en honde dop (want hulle is snaaks). Wat gaan jy vandag doen om lekker te lag?

Lees Matteus 11:16-17 en besluit dat jy gaan dans en lag as daar ’n kans is, en dat jy nie ’n suur pretbederwer gaan wees nie.