لشهر دجنبر؛ رحمات جديدة كل صباحعينة

إلا كان المسيح هو حياتك، فراك تحرّرتي من البحت اليائس باش تلقا الحياة في المواقف والبلايص والعلاقات.

هي حرية رائعة ماكنفكروش فيها وماكناقشوها بشكل كافي. كتحرّرك من التوتر والخوف والقلق اللّي كيعيشوهم بزّاف ديال الناس كل نهار. هي هدية حلوّة ديال نعمة تعطات ليك هنا ودابا. ماكانش ممكن تلقاها بوحدك. ماكانش ممكن تكسبها أولا توصل ليها. مازال ماتقدرش توقف قدّام الله وتقول راك كتستحقها. هي هدية ماخاصناش نتجاهلوها أولا نسيئو الفهم ديالها.

راك خديتي المسيح، وهاكدا خديتي الحياة. راه ماخاصّكش تقلّب على المعنى والغرض في الحياة. راك ماخاصّكش تقلّب على الهوية. راك ماخاصّكش تقلّب على شي حاجة باش تعطيك السلام الداخلي اللّي بغاه كل شخص. راك ماخاصّكش تتسائل على واش عمرك غتكون محبوب. راك ماخاصّكش تخمّم على أنّ حياتك وخدمتك ماغيوصلوك لوالو. راك ماخاصّكش تتسائل على واش عندك كل ماكتحتاج باش تواجه شنو جاي قدّامك اليوم. راك ماخاصّكش تخمّم في المستقبل ديالك. راك ماعمّرك غتبقا بوحدك مع اليد المحدودة ديال الموارد ديالك الخاصة. ماعمّرك غتبقا بوحدك. ديما كاين واحد الشخص كيفهمك وكيقدّم ليك المساعدة اللّي كتحتاجها. ماخاصّكش تخمّم على واش غيتغفرو دنوبك ونقاط الضعف ديالك غيتواجهو بالصبر والنعمة. ماخاصّكش تخمّم، حيت عندك منجّي غزا حياتك بنعمته وخلاّك تكون البلاصة اللّي فيها كيسكن.

هادشي علاش تحررتي من البحت اللّي ماكيساليش على الحياة واللّي كيهلك الناس. بزّاف ديال الناس كيقلّبو على الحياة فين هي ماكايناش. كيتمنّاو الزواج ديالهم يعطيهم السعادة اللّي مازال مالقاوهاش. كيتسنّاو من خداميهم يعطيوهم الهوية. كيتسنّاو من الناس والممتلكات يعطيوهم السلام. ماكيعرفوش بلّي راهم كيطلبو من المواقف والبلايص والعلاقات في الحياة اليومية باش يكونوا المنجي ديالهم. للأسف، هما كيشربو من بيار ناشفين وكياكلو الخبز اللّي ماعمّر يشبّعهم. راه المواقف والبلايص والعلاقات في الحياة اليومية هما مزيانين باش نستمتعو بيهم، ولكن خاصنا نفهمو بلّي هما ماعمّر يشبعو قلوبنا. هادشي علاش تعطا لينا منجّي حقيقي، الرب يسوع المسيح.

إدن عِوض نضيعو الوقت في هاد البحت على الحياة اللّي ماكيساليش، راك معروض باش تدخل في الراحة ديال الله كل حياتك. رتاح في هويتك كولده. رتاح في محبته الأبدية. رتاح في نعمته القوية. رتاح في حضوره الدائم وتدبيره الأمين. رتاح في الصبر دياله والغفران دياله. رتاح.

من أجل دراسة وتشجيع كتر: عبرانيين 4: 1-13