ကျွန်ုပ်တို့ကိုယ်စား - Time of Grace အမှုတော်လုပ်ငန်းမှ ခရစ်တော်ဒုက္ခခံတော်မူရာရက်၄၀ နှင့်ဆိုင်သောဆင်ခြင်နှလုံးသွင်းစရာများနမူနာ

သင်သည် ထာဝရအသက်ရှင်ခွင့်ရသည်

လူသားတို့၏သဘောသဘာဝအရ အရေးကြီးသောအရာများကို အချောင်ရယူလိုသောဆန္ဒရှိကြသည်မဟုတ်ပါလား။ ကျွန်ုပ်တို့ ကားမောင်းကြစဉ် ရှေ့ကား၏နောက်မီးအနီရောင်ရုတ်တရက်လင်းသောအခါ “အရာဝတ္ထုနှစ်ခု ပွတ်တိုက်ခြင်းနိယာမသည် ယနေ့ဖြစ်မြောက်ပါမလား“ ဟုစဉ်းစားမနေဘဲ ချက်ချင်း ဘရိတ်ကိုသာနင်းကြသည်မဟုတ်ပါလား။ သို့မဟုတ် နံနက်အချိန်တွင် သင်နိုးသောအခါ “ယနေ့ ကမ္ဘာ့ဆွဲငင်အားလျော့ပျောက်လျက် အာကာသဘက်သို့လွင့်သွားမလား“ ဟုစဉ်းစားမနေဘဲ သင်၏ခြေသည် မြေကြီးပေါ်မှာတည်မြဲတည်ကြောင်းသာအောက်မေ့လျက် ကြမ်းခင်းပေါ်လျှောက်သွားမည်မဟုတ်ပါလား။ ကျွန်ုပ်တို့သည် ကျွန်ုပ်တို့၏အသက်ကို တည်ငြိမ်စေသည့်စကြဝဠာစနစ်အပေါ် များစွာဂရုမစိုက်ဘဲနေတတ်ကြသည်။ သို့သော် အကယ်၍ ရှင်ပြန်ထမြောက်ခြင်းမရှိခဲ့လျှင် မည်သို့ဖြစ်မည်နည်း။ခရစ်တော်သည် မထမြောက်ခဲ့လျှင် အုတ်မြစ်မရှိသောအဆောက်အအုံသည် လေမုန်းတိုင်းလာသောအခါ အက်ကွဲ ပြိုလဲသကဲ့သို့ ခရစ်ယာန်ဘာသာနှင့်ပတ်သက်၍ သင်သိသောအရာအားလုံးသည်လည်း စတင်အက်ကွဲပြိုလဲပါလိမ့်မည်။ ခရစ်တော်သည် မထမြောက်ခဲ့လျှင် ကြောက်စရာအကောင်းဆုံးအဖြစ်မှာ သင်၏အပြစ်သည် ခွင့်လွှတ်ခြင်းမခံရဘဲနေသဖြင့် သင်သည် ထိုအပြစ်များကြောင့် စီရင်ခြင်းခံရမည်ဟူသောအဖြစ်ပင်။ ခရစ်တော်၌သေဆုံးသောသူတို့သည်လည်း ပျက်စီး​ကြ​လေ​ပြီ။ ရှင်ပေါလုက “ငါ​တို့​သည် ခရစ်တော်​၌ ယခု​ဘဝ​အတွက်​သာ မျှော်လင့်​စရာ​ရှိ​ခဲ့​လျှင် လူ​အပေါင်း​တို့​ထက် ပို၍​သနား​စရာ​ကောင်း​သော​သူ​ဖြစ်​ပေ​လိမ့်မည်“ ဟုဆိုခဲ့သည်။သို့သော် သမ္မာကျမ်းစာက “ခရစ်တော်​သည် သေ​သော​သူ​တို့​ထဲမှ ထမြောက်​တော်မူ​၍ အိပ်ပျော်​သော​သူ​တို့​တွင် အသီးဦး​ဖြစ်​တော်မူ​ပြီ“ ဟုဆိုထားသည်။ (၁ ကော ၁၅း၂၀) ယေရှုခရစ်တော်သည် ရှင်ပြန်ထမြောက်ခြင်း၏ပထမဦးဆုံးစံနမူနာဖြစ်သည်။ ကိုယ်တော်သည် မိမိသင်္ချိုင်းဂူထဲမှ ဝိညာဉ်ရောကိုယ်ခန္ဒာပါ ထွက်မြောက်လာခဲ့သောကြောင့် သင်နှင့်ကျွန်တော်သည် ထာဝရအသက်ရှင်ခွင့်ရကြသည်။ ကိုယ်တော်၏ရှင်ပြန်ထမြောက်ခြင်းသည် သင်၏အပြစ်ခွင့်လွှတ်ခံရကြောင်းအာမခံပေးသည်။ ကိုယ်တော်၏ရှင်ပြန်ထမြောက်ခြင်းသည် သင့်ကိုအာမခံပေးသည်။