Mavhesi emuBhaibheri Ane Mukurumbira kubva kuna SAN MATEO 24

Pakurirana nevamwe

Kapayhekxak sat ekmaso nentémakxa, kamaskok sat apkelásekhamap énxet. Wánxa agkok ewagkasakpok sat eyke teyp ma'a énxet apteme nak apyennaktésamo mehey'áseyam ko'o ekwokmoho néxa.

Ekyókxoho yókxexma sat kóllegaksek xa amya'a ektakmela ekxeyenma nak ma'a aptémakxa nak Wese' apwányam Dios, yakwayam enxoho elya'ásegwók apyókxoho pók aptémakxa énxet; keñe sat kammok néxa ekhem.

Kóllegak sat kéxegke amya'a ektepa kempakhakma s'e, tén han ma'a mók apkelókxa nak; nágkólyegwé aksa, hakte cháxa yakwánxa nak katnehek xa, háwe eyke yakwánxa makham katnehek néxa ekhem ma'a.

Elnapakpok sat énxet xama yókxexma, yenmexek sat ma'a apheykha nak mók apkelókxa, kampakhaxchek sat nahan mók apkelókxa; katyapok sat meyk segakhe, kayawheykha sat nahan xóp mók xama apkelókxa. Wánxa agkok, cháxa eyesextexa sekxo' kéllegeykegkoho ekmáske xa.

Kamaskok sat néten, kamaskok sat nahan keso náxop, wánxa agkok megkamassegwomek eyke ko'o sekpeywa.

Hakte elwak sat énxet apxámokma sexneyásamákpoho ko'o. Sat etnehek apkelpeywa s'e: ‘Ko'o Mesías’, apxámok sat nahan etnehek énxet apkelyexancháseykha.

“Keñe sat kólmaxchek kéxegke yakwayam kólnaktawasagkoho'; kóltekyók sat nahan, apyókxoho énxet sat nahan etaknók kéxegke ko'o eñamakxa. Apxámok sat énxet apkelyenseyam apteme melya'áseyam ma'a ekhem sat, etaknaweykxak sat cha'a pók apagko' énxet, etlakkasesek sat nahan cha'a yának emakpok pók. Elántépok sat Dios appeywa apkellegaso apkelmopwána amya'a nak, apxámok sat nahan etnehek énxet apkelyexancháseykha.

Aptahak axta apchátegmowágko Jesús se'e: —Kólleyxmakha sat, nágkólho aksa kólyexanchesha.

Kóllánekxak nahan kéxegkáxa kéltahakxa; hakte ewatak sat ektaha nak Apketche énxet neyseksa megkólhaxanma.

“Kólleyxmakha kéxegke, hakte megkólya'ásegkok ekwánxa ekhem yakwánxa ewatak Wese' kélagkok.

“Méko ekya'ásegkoho ekwánxa ekhem tén han ekwánxa hora, melya'ásegkok nahan ma'a Dios apkelásenneykha apheykencha'a nak néten, mey'ásegkok nahan ma'a Dios Apketche. Wánxa apya'ásegkoho m'a Apyap.

Hakte elwak sat énxet'ák apkeltemesásamap nak Mesías, tén han ma'a Dios appeywa apkellegaso apkelmopwána amya'a nak; elának sat nahan aksok magkenatcheso agko' nak agweta', tén han ma'a sempelakkaso nak agweta', yakwayam enxoho elyexanchesha énxet'ák, kawomhok sat nahan apkelyexancháseykha m'a ektaha nak Dios apkelyéseykha, apkepwagko enxoho.

“Sat katnehek nahan apkexyekmo sat ektaha nak Apketche énxet ma'a, ektémakxa axta aphamakxa Noé. Apyeneykegkek axta apyenéyak énxet, apteykegkek axta anhan aptéyak, kelyamhápeykegkek axta nahan, cham'a amonye ekwé axta mámeye ekyawe agko', ekwokmoho m'a ekhem aptaxna axta Noé kañe' yántakpayhe. Wa'ak axta mámeye ekwányam agko' neyseksa melhaxanma, sawhawók axta elnapa yegmen xa énxet'ák nak. Sat nahan katnehek apkexyekmo sat aptaha nak Apketche énxet.