Soma Biblia Kila Siku Agosti/2022Mfano

Tafakari pia 2 Nya 7:1-3 inayosema, Sulemani alipokwisha maombi hayo, moto ukashuka kutoka mbinguni, ukateketeza sadaka ya kuteketezwa na dhabihu; utukufu wa Bwana ukaijaza nyumba. Wala makuhani hawakuweza kuingia nyumbani mwa Bwana, kwa kuwa utukufu wa Bwana umeijaza nyumba ya Bwana. Wakatazama wana wa Israeli wote, uliposhuka ule moto, utukufu wa Bwana ulipokuwapo juu ya nyumba; wakasujudu kifulifuli hata nchi sakafuni, wakaabudu, wakamshukuru Bwana, wakisema, Kwa kuwa ni mwema; kwa maana fadhili zake ni za milele. Hapa tunaona kuwa, baada ya maombi ya Sulemani, Mungu, kwa njia ya moto ulioshuka, alionesha kuzikubali na kuzipokea sala, maombi na sadaka zilizotolewa. Ndipo Sulemani akawaombea baraka watu wote (m.55, Akasimama, na kuwabariki mkutano wote). Kisha akamwomba Mungu akae na taifa na kuliwezesha kutii amri zake. Aliomba akisema, Na ahimidiwe Bwana, aliyewapa watu wake Israeli kustarehe, vile vile kama yote aliyoyaahidi. Halikukosa kupatikana neno lo lote katika ahadi yake njema, aliyoahidi kwa mkono wa Musa, mtumishi wake. Bwana, Mungu wetu, na akae nasi, kama alivyokaa na baba zetu; asituache, wala asitutupe; aielekeze mioyo yetu kwake, ili tuende katika njia zake zote, na kuzishika amri zake, na sheria zake, na hukumu zake, alizowaamuru baba zetu. Na maneno yangu haya, niliyoyaomba mbele za Bwana, na yawe karibu na Bwana, Mungu wetu, mchana na usiku, ili aitetee haki ya mtumishi wake, na haki ya watu wake Israeli, kwa kadiri ya haja zao za kila siku. Watu wote wa ulimwengu wajue ya kuwa Bwana ndiye Mungu; hakuna mwingine. Mioyo yenu na iwe kamili kwa Bwana, Mungu wetu, kuenenda katika sheria zake, na kuzishika amri zake, kama ilivyo leo (m.56-61). Siku zote ibada zetu ziwe na unyenyekevu na kumfungulia Mungu mioyo yetu kama alivyofanya Sulemani. Tujenge pia tabia ya kumtolea Mungu sadaka ya shukrani na furaha kama Waisraeli, maana anasikia maombi yetu.