Soma Biblia Kila Siku 07/2025Mfano

Watu wa Mungu wanaelekezwa namna ya kuishi miongoni mwa watu wanaomwamini na wale wasiomwamini. Watu wa dunia wanajenga mahusiano katika uchumi, utamaduni na kijeshi. Taifa la Israeli lilitamani kujiunga na mataifa yaliyolizunguka ili kujiimarisha kiulinzi. Lakini tendo hilo lilikuwa ni chukizo kwa BWANA. Neno la Mungu linaonesha kuwa, watu wanahitaji msaada utokanao na kushikamana na Mungu. Mungu ndiye kiini na sababu ya kuwepo kwetu na mataifa yote. Mungu ndiye msaada unaotosha. Paulo anasisitiza kwamba Mungu ndiye msaada wetu wa kutosha, na hakuna kitu kinachoweza kututenga na upendo wake.Basi, tuseme nini juu ya hayo? Mungu akiwapo upande wetu, ni nani aliye juu yetu? Yeye asiyemwachilia Mwana wake mwenyewe, bali alimtoa kwa ajili yetu sisi sote, atakosaje kutukirimia na mambo yote pamoja naye? Ni nani atakayewashitaki wateule wa Mungu? Mungu ndiye mwenye kuwahesabia haki. Ni nani atakayewahukumia adhabu? Kristo Yesu ndiye aliyekufa; naam, na zaidi ya hayo, amefufuka katika wafu, naye yuko mkono wa kuume wa Mungu; tena ndiye anayetuombea. Ni nani atakayetutenga na upendo wa Kristo? Je! Ni dhiki au shida, au adha, au njaa, au uchi, au hatari, au upanga? Kama ilivyoandikwa, ya kwamba, Kwa ajili yako tunauawa mchana kutwa, Tumehesabiwa kuwa kama kondoo wa kuchinjwa. Lakini katika mambo hayo yote tunashinda, na zaidi ya kushinda, kwa yeye aliyetupenda. Kwa maana nimekwisha kujua hakika ya kwamba, wala mauti, wala uzima, wala malaika, wala wenye mamlaka, wala yaliyopo, wala yatakayokuwapo, wala wenye uwezo, wala yaliyo juu, wala yaliyo chini, wala kiumbe kinginecho chote hakitaweza kututenga na upendo wa Mungu ulio katika Kristo Yesu Bwana wetu(Rum 8:31-39).