Ang mga Baryang Pilak

BASAHIN

Si Judas Iscariote na isa sa 12 tagasunod ay pumunta sa mga namamahalang pari. Sinabi niya sa kanila, “Ano po ang ibabayad ninyo sa akin kung tutulungan ko kayong madakip si Jesus?” Noon din ay binigyan nila si Judas ng 30 pirasong pilak. Mula noon, humanap na si Judas ng pagkakataon upang traydurin si Jesus.

Mateo 26:14–16

Basahin din ang Lucas 22:3–6; Juan 13:2–3; Filipos 2:4–9.

PAG-ISIPAN

Kling, kling, kling . . . mahina at paulit-ulit na tunog ang maririnig habang nagbubungguan ang mga barya. Ang mga ito ay kumakalansing sa loob ng maliit na sisidlan ni Judas Iscariote. Bawat barya ay maliit at hindi kapansin-pansin ang laki. Bagamat gawa sa pilak, maaaring wala itong kinang at malamang ay kupas na dahil dumaan na ang mga ito sa maraming kamay. Tatlumpung pirasong pilak, bawat isa'y may mga ukit na larawan at marka, ang nakalagay sa sisidlan na ipit-ipit ni Judas Iscariote habang naglalakad siya galing sa pakikipag-usap niya sa mga punong pari papunta sa Taong pagtataksilan niya.

Naranasan mo na ba ang mapagtaksilan ng isang tao? Talagang masakit ang pagkabasag ng tiwala, pagkadismaya, kalituhan, at galit lalo na kung ang nagtaksil ay yung taong mahal at pinagkatiwalaan mo.

Si Jesus ay nakaranas ng ganitong pagtataksil mula kay Judas, na naging kasama Niya habang Siya ay nagturo, nagpagaling ng may sakit, at nagtaboy ng mga demonyo. Nasaksihan ni Judas sa sarili niyang mga mata ang mga himala ni Jesus. Sabay silang kumain, naglakbay, at nagkasama ng maraming oras. Pero sa kabila ng lahat ng iyon, hindi ibinigay ni Judas kay Jesus ang pag-iingat at pagpapahalaga para sa kung sino Siya. Sa huli, mas pinili ni Judas ang pansariling kapakanan kaysa ang ugnayan nila ni Jesus, at ito ang nagtulak sa kanya na ipagkanulo ang ating Tagapagligtas sa mga punong pari.

Sa Lumang Tipan, tatlumpung pirasong pilak ang halaga na ibinabayad para sa isang alipin na napatay ng isang baka (Exodus 21:32). Bagamat hindi tiyak, ang tatlumpung pilak noong panahon ng Bibliya ay maaaring mga shekel o tetradrachm, na katumbas ng ilang buwang sahod. Sa kasalukuyan, maaari itong maitumbas sa humigit-kumulang PHP 100,000. Sa halagang iyon, ipinagkanulo ni Judas si Jesus.

Hindi lang pagtataksil ni Judas ang ipinapaalala sa atin ng tatlumpung pirasong pilak na ito kundi pati na rin ang sarili nating pagtataksil. Kung magpapakatotoo tayo, may mga pagkakataon na sa ating kahinaan, maaaring makita rin sa atin ang bakas ng pagiging tulad ni Judas. Maaaring naipagpalit din natin si Jesus—at madalas, para sa mas maliit pa na halaga. Maaaring mas inuna pa natin ang pansariling ambisyon, matagumpay na karera sa buhay, nakakasirang relasyon, materyal na bagay, katayuang panlipunan, o kahit ang pansamantalang kasiyahan kaysa sa Kanya.

Bagamat malungkot ang pagtatapos ng kuwento ng tatlumpung pilak para kay Judas, higit na mababa ang halaga ng kanyang pagtataksil sa halaga na binayaran ni Cristo para sa ating kaligtasan. Napakababa ng pagpapahalagang ibinigay ni Judas kay Jesus kaya’t naipagpalit niya si Jesus sa halagang katumbas ng isang alipin, ngunit pinahalagahan tayo ni Jesus nang dumating Siya sa anyo ng isang alipin upang palayain tayo mula sa pagka-alipin sa kasalanan.

Kahit alam ni Jesus na ipagkakanulo siya ni Judas, hindi Niya ito kinondena. Sa halip, yumuko Siya at hinugasan ang mga paa ni Judas, pagpapakita ng kababaang-loob at pagmamahal Niya para sa kanya (Juan 13:2–3). Ganito rin ang pagmamahal ni Jesus sa bawat isa sa atin, sa kabila ng ating mga kasalanan at pagkukulang. Ang Kanyang pag-ibig ay hindi nanghuhusga o nangkokondena. Sa halip, nag-aalok Siya ng walang-hanggang biyaya para tubusin tayo at ibalik sa Kanya.

Nawa'y maipaalala sa ating ng bigat ng tatlumpung pilak hindi lamang ng ating pangangailangan ng pagtubos, kundi pati na rin ng malaking halaga na binayaran ni Jesus para dito. At nawa'y sa Kanyang biyaya, matutunan nating pahalagahan Siya nang higit sa lahat, kabilang na ang ating mga buhay.

Thirty Pieces of Silver

Ni Robert Taylor

(Isinalin sa Filipino)

Walang kasiyahan sa yaman o sa kasikatan

Kung ikinakaila naman ang ating Tagapagligtas

Bawat kastilyo’y bumabagsak, at ang buhay ay nasirang pangarap

Kung si Jesus ay wala sa ating piling

Tatlongpung pirasong pilak ang halaga na ibinigay nila

Tatlongpung pirasong pilak, isang alipin ang katumbas na halaga

Ang aking puso’y inalay ko sa Kristong ipinagkanulo

At alam ko kung gaano Niya ako minahal

Sa pamamagitan ng halagang ibinayad Niya

TUMUGON

• Pag-isipan kung paano mo kaya naipagpalit si Jesus sa ibang mga bagay sa buhay. Kausapin ang Diyos tungkol dito at tanggapin ang Kanyang kapatawaran.
• Paano natin maipapakita o maipapahayag na pinahahalagahan natin si Jesus nang higit pa sa anumang bagay? May mga bagay ba na sa tingin mo ay kailangan mong isuko kay Cristo?
• Naranasan mo na bang magtaksil sa isang tao o kaya ay pagtaksilan ng iba? Paano ka makakatugon sa paraang nagpapakita ng pagmamahal ni Cristo, at ano ang mga maaari mong gawin tungo sa pagkakaroon ng pagpapatawad at pagkakasundo?

PANALANGIN

Panginoong Jesus, patawad po sa mga pagkakataong ipinagpalit Kita para sa sarili kong kapakinabangan. Sa aking kahinaan, hindi ko po nakita ang Iyong tunay na halaga at pinili ko ang ibang mga bagay upang punan ang puwang na tanging Ikaw lamang ang makakapuno. Salamat po sa pagpapakumbaba Mo at sa pagkapako sa krus upang tubusin ako. Nawa’y makita sa buhay ko ang Iyong pag-ibig at kaluwalhatian, at sa pamamagitan ng Iyong biyaya, nawa’y maging handa akong ibigay ang lahat sa pag-aalay ko ng aking sarili sa Iyo. Amen.

AWIT

Beautiful Love

Victory Worship