Níks kan ons uit sy hand ruk nie

Die ewige lewe is die kosbaarste gawe; ’n gawe wat net die Here kan gee. Daarom is dit die één ding wat die Satan die graagste van die mens wil weerhou en die hardste probeer om ons van te beroof. Dit is egter net nóg ’n ding wat Satan nie kan doen nie.

Let wel, daar is baie dinge wat die duiwel wél met die gelowige kan doen. Hy kan jou met versoekings teister — dit het hy selfs met Jesus probeer. Hy kan struikelblokke op jou pad plaas — dink byvoorbeeld aan Paulus se woorde in 1 Tessalonisense 2:18 waar hy sê dat die Satan hom verhinder het om die Tessalonisense te besoek. Hy kan gelowiges mislei en misbruik – dink aan Petrus wat in Matteus 16:23 deur Jesus bestraf moes word omdat hy toegelaat het dat die Satan hom probeer gebruik om Jesus van die kruis af weg te hou; hy kan ons laat twyfel, intimideer, vreesagtig maak, in sommige gevalle selfs siek maak en smarte aandoen, en vele meer.

Die Satan kan ons egter nié uit die hand van die Here ruk nie. Jesus sê niémand, kan dit regkry nie.

Jesus het self só op die krag en beskerming van sy Vader vertrou dat sy laaste woorde na die smartlike ses ure aan die kruis ons verseker: “Vader, in u hande gee Ek my gees oor!” (Lukas 23:46 AFR53).

Ek en jy is veilig in sy hande. Die Satan kan ons nié uit sy hande ruk nie.

Here, ek is veilig in u hand. Amen.

Hierdie oordenkings is geneem uit VEILIG IN SY HAND deur Isak Burger © Christelike Uitgewersmaatskappy