ကျွန်ုပ်တို့ကိုယ်စား - Time of Grace အမှုတော်လုပ်ငန်းမှ ခရစ်တော်ဒုက္ခခံတော်မူရာရက်၄၀ နှင့်ဆိုင်သောဆင်ခြင်နှလုံးသွင်းစရာများနမူနာ

နှိမ့်ချသောကြီးမားမှု

ကလေးသူငယ်များသည် ယေရှုနှင့်ပတ်သက်၍ ပထမဦးဆုံးနှစ်သက်ကြသည့်အကြောင်းမှာ ကိုယ်တော်၏တန်ခိုးတော်အကြောင်းများဖြစ်မည်ထင်ပါသည်။ သူတို့အနေဖြင့် “ကိုယ်တော်သည် အလွန်အံ့ဩဖွယ်ကောင်းသောအရာကိုပြုလုပ်နိုင်လေစွ။ လေမုန်းတိုင်း၏သခင်၊ အနာရောဂါကိုပိုင်နိုင်သူ၊ နတ်ဆိုးတို့ကိုအောင်နိုင်သူ၊ သေသောသူကိုထမြောက်စေနိုင်သူ--ကိုယ်တော်မတတ်နိုင်သောအရာတစ်စုံတစ်ခုမျှမရှိပါ။ ကိုယ်တော်သည် အမှန်ပင် စူပါမန်း၊ ဘက်မန်း တို့ထက် အပြတ်သားနားသောလူစွမ်းကောင်းဖြစ်သည်“ ဟုထင်နေပါလိမ့်မည်။

သို့သော် သင်တို့အသက်အရွယ်ရောက်လာသည့်အခါ ယေရှု၏နှိမ့်ချသောလုပ်ဆောင်မှုအတွက် ကိုယ်တော်ကို ပို၍နှစ်သက်ကြသည်။ ကျမ်းစာ၌ရေးထားသောအကြောင်းအရာထဲမှ အစွမ်းထက်ဆုံးသောအကြောင်းသည် မာန်ဒီ ကြာသပတေးညနေတွင်ဖြစ်သောအကြောင်းအရာဖြစ်သည်။ လက်ဝါးကပ်တိုင်ပေါ်တင်သတ်ခြင်းမခံမီ နာရီအနည်းငယ်ပိုင်းတွင် ယေရှုသည် အစေခံသောခေါင်းဆောင်ဖြစ်ရမည့်ပုံကို မိမိတပည့်တော်တို့အား မမေ့နိုင်သောသင်ခန်းစာဖြင့်ပြသခဲ့သည်။

ကိုယ်တော်သည် ရေထည့်ထားသောဇလုံနှင့် ပဝါကိုယူပြီးလျှင် သူတို့တစ်ဦးစီတို့ရှေ့တွင်ဒူးထောက်လျက် သူတို့ခြေကိုဆေးခဲ့သည်။ ကိုယ်တော်က “သင်​တို့​၌ ငါ​ပြု​ခဲ့​သော​အရာ​ကို နားလည်​ကြ​သလော။​ . . . သခင်​ဘုရား​ဖြစ်​လျက် ဆရာ​လည်း​ဖြစ်​သော​ငါ​သည် သင်​တို့​၏​ခြေ​ကို​ဆေး​လျှင် သင်​တို့​သည်​လည်း အချင်းချင်း​တို့​၏​ခြေ​ကို​ဆေး​ရ​ကြ​မည်“ ဟုမိန့်တော်မူခဲ့သည်။ (ယော ၁၃:၁၂၊ ၁၄)

ယေရှုသည် အစေခံခြင်းနှင့်ဝေဒနာခံခြင်းတို့ဖြင့် ကျွန်ုပ်တို့ကိုရွေးနုတ်ခဲ့သည်။ ကိုယ်တော်၏နှိမ့်ချသောလုပ်ဆောင်မှုသည် ကျွန်ုပ်တို့၏နေ့စဉ်ကိုယ်နေဟန်ထားကို ပြုပြင်လှုံ့ဆော်ပေးသည်။ သင့်ပတ်ဝန်းကျင်မှာရှိသောသူတို့က သင်သည် တစ်ခါတရံ ခေါင်းမာသည်၊ မာနကြီးသည်၊ အထက်စီးဆန်သည်ဟူ၍ သင့်အားပြောဖူးပါသလား။ သင်သည် သင်၏သက်သာမှု၊ လိုလားမှုနှင့် ပျော်ရွှင်မှုတို့ကိုအသားပေးသည့်အရာဘက်သို့ အလိုအလျောက်ယိုင်းလျက်ဦးတည်သွားတတ်ပါသလား။

သင့်အိမ်ထဲတွင် မည်သို့သော ခြေဆေးခြင်းနှိမ့်ချမှုပုံကိုတွေ့ရှိနိုင်သနည်း။ နမူနာ ၃ ခု ကို ရေးသားသတ်မှတ်ပြီး ယနေ့ပင်ထိုအရာကိုလုပ်ပါ။