Mavhesi emuBhaibheri Ane Mukurumbira kubva kuna Tiago 1

Pakurirana nevamwe

Ase takevó, ichnárasĩ õsi õsipa oĩsmẽinã metsápai shokotsoma. Aaro awesáma, ichnárasĩ tanai shokosmẽinã, ‘Yové Koĩmẽ txipotashõ enékawãtĩpá’, ikĩ noke chinãya.

Askávai mato wetsase ‘ea yosímarvi, ẽ yosíkoĩkanõ’, ikĩ chinãinãro, Yové Koĩ mã ãtsã ati. Aa ivõ pãté imísma, vatxin imísma aká. Mã ãtsã aka ivorasĩ mato ashõkatsa.

“Askámaĩnõ matomẽ ẽ noíatõ neskátõ ẽ vanaavere, tanatsoma. Matsíshopari nĩkãtsoma. Ikívisi vananíma, ichnákémasevi atsoma.

Askásho enétĩpa ivo chinã keyá atsoma. Mã aská akáro, mã tsasikatsa, Yové Koĩni mato chinãshoa ivorasĩni mãaimai mã shokokatsa aká.

Aaivo vana askásevi, nĩkãkastsomároa. Anõ ikí shokotsoma. Pãtxõkase nĩkãsho mã shokoro maríse mã parãnarívi.

“Askái, ichnárasĩ oĩsmẽinã ‘Jesustxõiro ea enétĩpá’, ikĩ chinãya ivoro Yové Koĩni roapa ivo ashõya. Ãwẽ askái niá oĩinã awetimakĩ nitxĩkatsa. Ãatõ tavámatima ivõ ikí ato ãwẽ vana ati, anõ noípa ivorasĩ yoí.

Katsése roapa ivorasĩ nõ anõ ikíro, naĩsho veá ivorvi, nokẽ papa Yové Koĩnamãsho. Aaro naĩ naóya ivorasĩ shovimayãtáya. Askámẽkĩ atõ naó ikítõ ikí tekísma, Yové Koĩni chinãro.

Aská vana nĩkãsmẽinã anõ ayamai niayaro yora veístĩsho arí oĩnavai kashõ ‘aská ẽ oĩnáitserã’, imísmarvi, inói petxisma.

Askámaĩnõ esé koĩ, nokẽ Papa Yové Koĩni roa aka ivoro neská. Vake maõrasĩ ato vesoi, aĩvo mekẽyavorasĩ vesoi, naaivo mai shavapa ichnárasĩ ivõ ‘aa keskákemísi’, iinã vesótái ati”, iinã mato ẽ aká.

Askámaĩnõ, noke anõ itimatõ ikatsiinã ‘Ii, Yové Koĩni ea yomẽ ashõrívi’, ikĩ chinãtimarvi. Yové Koĩro yora ãwẽ yomẽ ashõa yamarvi, arí anõ itimatõ iokatsi imísmarvi aká. Noke yorarasĩ anõ itimatõ ikatsiinãro noke kẽeyãwasho, nokẽ chinã naki ichná tsaósho, yorã akátõ akĩ noke parãsho ichnák pakeya.

Askávaíse wetsaro, Jesustxõya ivorasĩní, onís awei shokoi, yorã ari oĩtanáma mã akásmẽkĩ aakiri chinãtima, mekípakĩka chinãsho shokotsoma. Aaro awesáma, Yové Koĩniro yora roapa akátõ akĩ matomẽ eséyaai.